Pune : पुणे महापालिकेकडून सुमारे ₹1200 कोटींच्या एसटीपी प्रकल्प निविदांना मान्यता; ‘हॅम’ पद्धतीचा अवलंब

Pune : पुणे महानगरपालिकेच्या स्थायी समितीने शहरातील दोन नवीन आणि चार जुन्या मैलापाणी शुद्धीकरण प्रकल्पांच्या (एसटीपी) उभारणी व नूतनीकरणासाठी सुमारे ₹1200 कोटींच्या निविदांना मंजुरी दिली आहे. या कामांसाठी प्रथमच ‘हॅम’ (हायब्रिड ऍन्युइटी मॉडेल) पद्धतीचा अवलंब करण्यात आला असून, या प्रक्रियेमुळे तब्बल ₹110 कोटींची बचत झाल्याचा दावा महापालिका प्रशासनाने केला आहे.

महापालिकेचा उद्देश शहरात निर्माण होणाऱ्या मैलापाण्यावर प्रभावी प्रक्रिया करून ते पुनर्वापरासाठी योग्य बनवणे आणि नंतर नदीत सोडणे हा आहे. यासाठी सहा एसटीपी प्रकल्पांचे नूतनीकरण आणि उभारणी करण्यात येणार आहे. भैरोबा नाला आणि नरवीर तानाजी वाडी येथे असलेले विद्यमान एसटीपी प्रकल्प पाडून तेथे नव्याने प्रकल्प उभारले जातील, तर एरंडवणा, बोपोडी, नवीन नायडू प्रकल्प आणि विठ्ठलवाडी येथील केंद्रांचे आधुनिकीकरण केले जाईल.

Pune : पुण्यात ठाकरे गटाचं आंदोलन तापलं! महिला आयोगाच्या अध्यक्षा रुपाली चाकणकर यांच्या राजीनाम्याची जोरदार मागणी

महापालिकेने या प्रकल्पांसाठी मे महिन्यात निविदा काढल्या होत्या, मात्र त्या उच्च दरात आल्याने प्रशासनाने दर कमी करण्यासाठी प्रयत्न केले. अखेर ‘हॅम’ पद्धतीने निविदा काढल्यानंतर सर्वात कमी ₹1332 कोटींची ऑफर प्राप्त झाली. प्रशासनाने दर पुन्हा कमी करून प्रकल्प ₹1200 कोटींमध्ये मंजूर केला.

या प्रकल्पासाठी ‘अमृत 2.0’ योजनेतून केंद्र व राज्य सरकारकडून 60% अनुदान मिळणार असून उर्वरित 40% निधी ठेकेदार गुंतवणार आहे. ठेकेदाराला व्याज स्वरूपात महापालिकेकडून रक्कम देण्यात येईल. हा प्रस्ताव आता राज्यस्तरीय छाननी समितीकडे पाठविला जाणार असून, मंजुरी मिळाल्यानंतर निधी उपलब्ध होईल.