Maharashtra : 'साहेबांच्या कामाच्या पद्धतीला तोड नाही'; बारामतीत अजित पवारांकडून शरद पवारांचं कौतुक, म्हणाले..

Maharashtra : उद्धव ठाकरे अन् राज ठाकरे यांच्या संभाव्य युतीची चर्चा राजकीय वर्तुळात रंगत असताना, अजूनही लोकांच्या मनात एक प्रश्न कायम आहे, 'पवार काका - पुतणे कधी एकत्र येणार?' अद्याप तरी मात्र कुणीही याचे संकेत दिले नाही. पण नुकतेच बारामतीत उपमुख्यमंत्री अजित पवार यांनी राष्ट्रवादी काँग्रेसचे सर्वेसर्वा शरद पवार यांचं कौतुक केलं आहे. 'साहेबांच्या कामाच्या पद्धतीला तोड नाही', असं अजित पवार म्हणाले.

अजित पवार आपल्या भाषणात शरद पवारांवर बोलताना जपूनच बोलत असल्याचं पाहायला मिळत आहे. लोकसभा निवडणुकीवेळी शरद पवार यांच्यावर टीका करण्यात आली होती. मात्र, यामुळे त्यांच्या पदरी अपयश आलं. मात्र, गेल्या काही महिन्यांपासून अजित पवार आपल्या भाषणातून शरद पवार यांचे कौतुक करत आहेत. याचा प्रत्येय पुन्हा एकदा बारामतीतीत एका सभेतून आलाय.

बारामतीत सहकारी बँकेच्या वार्षिक सभेचं आयोजन करण्यात आलं होतं. यावेळी अजित पवार सभेत उपस्थित होते. भाषणेदरम्यान, अजित पवार म्हणाले, '१९९१ साली जेव्हा मी आमदार झालो. तेव्हा मला माहित होतं की, माझ्या कामाची तुलना साहेबांच्या कामाशी केली जाईल. शरद पवार यांच्या कामाच्या पद्धतीला तोड नाही', असं अजित पवार म्हणाले.

शरद पवार यांच्याबाबतीत बोलताना अजित पवार म्हणाले, 'मी अनेकदा म्हणतो की बारामतीला माझ्यासारखा आमदार कधीच मिळणार नाही. जो सकाळी ६ वाजता काम सुरू करतो. शरद पवार हे खासदार होण्यापूर्वी याच मतदारसंघात आमदार होते'. यानंतर अजित पवारांनी शब्द फिरवला, 'मागच्या आमदारांवर टीका करायची नाही. कारण तुम्ही लगेच म्हणाल की, अजित पवारांनी साहेबांशी तुलना केली. खरं तर त्यांना बाकीचाही व्याप होता. देश अन् राज्याचे राजकारण पाहायचे होते. नंतरच्या काळात बारामतीचा अधिक विकास केला', असं अजितदादा म्हणाले.