मुंबई: पोलिसांवर जीवघेणे हल्ले कुठे उगारली तलवार तर कुठे दुचाकी घालून चिरडण्याचा प्रयत्न!

मुंबई: कायदेशीर कारवाईचा राग मनात धरून पोलिसांवर हल्ला करण्याच्या दोन घटना मुंबईत समोर आल्या आहेत. एमआरए मार्ग परिसरात नाकाबंदीवेळी कारवाईसाठी दुचाकी अडविल्याने एका आरोपीने पोलिस कर्मचाऱ्यावर छोटी तलवार उगारून जीवे मारण्याचा प्रयत्न केला. तर भांडुपमध्ये मद्यधुंद अवस्थेत भरधाव दुचाकी चालवणाऱ्या तरुणाने पोलिस कर्मचाऱ्याच्या अंगावर दुचाकी घालण्याचा प्रयत्न केला. या दोन्ही प्रकरणांत संबंधित पोलिस ठाण्यांत गुन्हे दाखल करण्यात आले आहेत.

एमआरए मार्ग पोलिस ठाण्यात दाखल गुन्ह्यानुसार, २५ ऑक्टोबर रोजी मध्यरात्री १२.३० ते १ वाजण्याच्या सुमारास कल्पना जंक्शन, पी. डीमेलो रोड येथे पोलिस कर्मचारी सचिन कोकरे नाकाबंदीचे कर्तव्य बजावत होते. त्यावेळी कर्नाक बंदरच्या दिशेने विरुद्ध दिशेने दुचाकीवरून येणाऱ्या दोघांना त्यांनी थांबविले. त्यांच्यावर कायदेशीर कारवाई करण्याची प्रक्रिया सुरू असताना दुचाकीवरील आरोपीने त्याच्याकडील छोटी तलवार कोकरे यांच्यावर वार करण्यासाठी उगारली.

नाकाबंदीदरम्यान प्रकार
आरोपीने त्यांना शिवीगाळ व मारहाण करून त्यांच्या सरकारी गणवेशाचे नुकसान केले. तसेच त्यांच्या कर्तव्यात अडथळा निर्माण केला. याप्रकरणी आरोपीविरोधात गुन्हा दाखल आहे. दुसरी घटना भांडुप पश्चिम येथील मद्रास कॅफे परिसरात घडली. २५ ऑक्टोबर रोजी पहाटे विशेष ऑल आऊट मोहिमेअंतर्गत नाकाबंदी सुरू होती.
जाणीवपूर्वक दुचाकी अंगावर घातल्याचा आरोप
पहाटे २.२० वाजण्याच्या सुमारास दुचाकीवरून एक तरुण भरधाव वेगाने दक्षिण वाहिनीवरून आला. पोलिसांनी त्याला थांबविण्याचा प्रयत्न केला असता तो हुलकावणी देऊन निघून गेला. सुमारे १० ते १५ मिनिटांनी तोच तरुण पुन्हा त्याच मार्गाने नाकाबंदीच्या दिशेने भरधाव वेगाने आला. पोलिस अंमलदार आप्पासो हजारे यांनी त्याला थांबण्याचा इशारा केला. मात्र, तरुणाने जाणीवपूर्वक दुचाकी त्यांच्या अंगावर घालण्याचा प्रयत्न केला.

बॅरिकेडला दुचाकी धडकल्याने तरुण गंभीर जखमी
हजारे यांनी प्रसंगावधान राखत बाजूला उडी घेतली. त्यानंतर दुचाकीवरील नियंत्रण सुटल्याने ती नाकाबंदीच्या बॅरिकेडला धडकली आणि तरुण रस्त्यावर पडला. त्याच्या डोक्याला किरकोळ दुखापत झाली आहे. पोलिसांनी त्याला ताब्यात घेऊन उपचारासाठी रुग्णालयात नेले. चौकशीत त्याचे नाव केशव सुब्रलोगा नायडू (२७) असून तो मद्यधुंद अवस्थेत विनापरवाना वाहन चालवत असल्याचे समोर आले. त्यानुसार गुन्हा नोंदवत त्याच्यावर अटकेची कारवाई करण्यात आली आहे.