Pune Rave Party : ड्रग्ज घेतलं नाहीत, गुन्हा नाही, मग जावई पहिल्या क्रमांकाचा आरोपी कसा? खडसे पोलिसांवर संतापले

Pune Rave Party : पुण्यातील रेव्ह पार्टी प्रकरणात राष्ट्रवादी काँग्रेसचे नेते एकनाथ खडसे यांचा जावई प्रांजल खेवलकर यांना पोलिसांनी अटक केली आहे. या प्रकरणावर राजकारण चांगलेच तापले आहे. आता स्वत: एकनाथ खडसे यांनी पुण्यामध्ये पत्रकार परिषद घेत पोलिसांच्या कारवाईवर अनेक प्रश्न उपस्थित केले आहेत. 'प्रांजल खेवलकर यांच्यावर एक ही गुन्हा नाही. त्यांना एक नंबरचा आरोपी का केला?', असा सवाल एकनाथ खडसे यांनी पोलिसांना विचारला आहे. 'हे कृत्य निव्वळ बदनामी करण्यासाठी केले. आमचा लढा सुरू राहिल. सत्य काय ते समोर येईल', असे खडसे म्हणाले.

एकनाथ खडसे यांनी पोलिसांनी केलेल्या कारवाईवर अनेक प्रश्न उपस्थित केले आहेत. 'पोलिसांना माझे काही प्रश्न आहेत. संगीत नाही, गोंधळ नाही, रेव्ह पार्टी कसं म्हणता. रेव्ह पार्टी म्हणजे काय? व्याख्या माहिती आहे का? पोलिसांनी जी कारवाई केली त्याचे व्हिडिओ मीडियाच्या माध्यमातून समोर आले. प्रायव्हेट लाईफचे व्हिडीओ का शेअर केले? पोलिसांना हे अधिकार आहेत का? पोलिसांना चेहरे दाखवण्याचा अधिकार नाही. यातून त्यांनी बदनामी केली.', असे अनेक प्रश्न खडसेंनी थेट पोलिसांनाच केले आहेत.

कुटुंबाला बदनाम करण्याचा हा प्रयत्न असल्याचे म्हणत खडसेंनी पुढे सांगितले की, 'पोलिसांनी खोटे गुन्हे दाखल केले. प्रांजल खेवलकर यांच्यावर एक ही गुन्हा नाही. त्यांना एक नंबरचा आरोपी का केला?' रेव्ह पार्टी ५-६ जणांची असते का? एका महिलेच्या बॅगमधून अमली पदार्थ सापडले मग तिला का नाही केले पहिल्या नंबरचे आरोपी? पहिल्या क्रमांकाचा आरोपी तिला करून या लोकांना साक्षीदार करायला हवं होतं. खडसे कुटुंबीयाला बदनाम करण्याचा हा प्रयत्न आहे.'

एकनाथ खडसे पुढे असे म्हणाले की, 'प्रांजल यांनी मला सांगितलं आहे की आयुष्यात एकदा त्यांनी ड्रग्स घेतलेले नाही. माझ्यावर पाळत ठेवण्यात आली असं मला जावयाने सांगितलं आहे. साध्या वेशातील पोलिस माझ्यावर पाळत ठेवत होते हे त्यांनी सांगितलं. वेस्टिन हॉटेलमध्ये पोलिस आले तिथल्या पार्किंगमधील सीसीटीव्हीत पोलिस दिसत आले. हा प्रकार संशयास्पद आहे. प्रफुल लोढा हनी ट्रॅपमध्ये सरकार तत्परता घेऊन माहिती का नाही देत? नाशिकमध्ये हनी ट्रॅप गवगवा केला. खडसे कसे बदनाम होतील असा प्लॅन केला जातोय.'