Badlapur Firing Jagdish Kudekar : "पोलिसांच्या चौकशीला सामोरं जायला मी तयार आहे... "; जगदीश कुडेकर यांचं मीडियासमोर स्पष्टीकरण

 

Badlapur Firing Jagdish Kudekar : काही दिवसांपूर्वी बदलापूरमध्ये आमदार किसान कथोरे यांच्या घराबाहेर बोराडपाडा रस्त्यावर गोळीबार झाला होता. या गोळीबारात अल्ताफ शेख नावाचा तरुण गंभीर जखमी झाला होता. जखमी झालेल्या अल्ताफ शेख याने जगदीश कुडेकर यांचे नाव घेतले आहे. जगदीश कुडेकर हे शिवसेना शिंदे गटाचे बदलापूर उपशहर प्रमुख असून या गोळीबार प्रकरणात त्यांचे नाव आल्याने राजकीय वर्तुळात खळबळ उडाली.

दरम्यान बदलापुरात अल्ताफ शेखवर झालेल्या गोळीबाराशी माझा काडीमात्र संबंध नसून मी पोलिसांच्या चौकशीलाही सामोरं जायला तयार आहे असे वक्तव्य जगदीश कुडेकर यांनी केले आहे.

गुरुवारी बदलापूर येथे आमदार किसान कथोरे यांच्या घराबाहेर बोराडपाडा रस्त्यावर अल्ताफ शेख या तरुणावर पाच ते सहा जणांच्या समूहाने गोळीबार केला. या गोळीबारात जखमी झालेल्या अल्ताफ शेख याने दिलेल्या तक्रारीनंतर विवेक नायडू, उदय झुठे, शेखर गडदे, सोहम मेस्त्री आणि इतर दोघांविरुद्ध गुन्हा दाखल करण्यात आला आहे. मात्र अल्ताफ याने या गोळीबाराचा मुख्य सूत्रधार शिवसेना शिंदे गटाचे बदलापूर उपशहर प्रमुख जगदीश कुडेकर असल्याचे सांगितले आहे.

याप्रकरणी किसान कथोरे यांनी स्पष्टीकरण देत मीडियासमोर म्हटले आहे की, अल्ताफच्या आरोपांना उत्तर दिलं आहे. हा गोळीबार झाला त्यावेळी मी माझ्या पत्नीसह पोलीस ठाण्यातच उपस्थित होतो. पोलीस ठाण्यातील सीसीटीव्ही फुटेज काढल्यास हे स्पष्ट होऊ शकेल. या गोळीबाराशी आपला काडीमात्र संबंध नसून पोलिसांच्या चौकशीला सामोरं जायला मी तयार आहे, असं म्हणत हा गोळीबार आपपसातल्या भांडणातून घडल्याचा दावा जगदीश कुडेकर यांनी केला आहे.

दरम्यान आता या प्रकरणाला राजकीय वळण मिळालं असून पोलीस या घटनेचा अधिक तपास करत आहेत. परंतु या गोळीबाराचा सूत्रधार कोण हे अनुत्तरीतच आहे.