Pune Crime: हॉटेलमध्ये गोळीबार, गोळी टेबलाच्या आरपार, माजी नगरसेवक पोलिसांच्या ताब्यात, पिंपरी-चिंचवड हादरलं

Pune : पिंपरी-चिंचवड शहरात दिवसेंदिवस गुन्हेगारी डोके वर काढत आहे. त्यातच काळेवाडी परिसरातून एक मोठी बातमी समोर आली आहे. हॉटेलमध्ये बसलेल्या दोघांनी टेबलवर गोळीबार केल्याची घटना समोर आली आहे. या घटनेत एका माजी नगरसेवकाचा समावेश असून दोघांना पोलिसांकडून अटक देखील करण्यात आली आहे.

घटनेत माजी नगरसेवकाचा समावेश

सचिन दत्तू नढे, विनोद जयवंत नढे अशी अटक केलेल्या माजी नगरसेवकांची नावे आहेत. गुरुवारी रात्री पावणे नऊच्या सुमारास ही घटना घडली आहे. याप्रकरणी वाकड पोलीस ठाण्यामध्ये तुषार लक्ष्मीचंद भोजवानी (वय २४, रा. पाचपिर चौक, पंचनाथ कॉलनी, काळेवाडी) यांनी फिर्याद दिली आहे.

Pune Crime: हॉटेलमध्ये गोळीबार, गोळी टेबलाच्या आरपार, माजी नगरसेवक पोलिसांच्या ताब्यात, पिंपरी-चिंचवड हादरलं

फटाके फुटल्यासारखा आवाज, जाऊन पाहिलं तर गोळी टेबलाच्या आरपार

याबाबत पोलिसांनी दिलेली माहिती अशी की, गुरुवारी रात्री पावणे नऊच्या सुमारास सचिन नढे, विनोद नढे, आणखी दोघेजण असे चौघेजण काळेवाडी येथील असणाऱ्या पेट्रोल पंपा समोर असलेल्या एका हॉटेलमध्ये बसले होते. यादरम्यान या हॉटेलमध्ये जोरात फटाके फुटल्यासारखा आवाज आला. हॉटेलच्या मॅनेजर तुषार भोजवानी यांनी हॉटेलच्या पहिल्या मजल्यावर जाऊन पाहिले असता सचिन नढे याच्या हातामध्ये लोखंडी रिवाल्वर होते. सचिन याने जेवणाच्या प्लेट ठेवण्याच्या पत्र्याच्या सर्विस टेबलवर फायर केला. पिस्तूल मधून सुटलेली गोळी ही टेबलमधून आरपार जाऊन टेबलाला छिद्र पडले.

इतर ग्राहक घाबरुन पळाले

गोळीबार झाल्याची घटना समजल्यानंतर हॉटेलमध्ये बसलेले इतर ग्राहक भीतीने घटनास्थळावरून पळून गेले. हॉटेल चालकांकडून पोलिसांना सांगण्यात आले. पोलिसांनी घटनास्थळी धाव घेत दोघांना ताब्यात घेतले. यात पिंपरी चिंचवड महानगरपालिकेचे माजी नगरसेवक विनोद नढे असल्याचे समोर आले.

या घटनेमुळे वाकड परिसरामध्ये तणावाचे वातावरण निर्माण झाले होते. गोळीबार नेमका कुठल्या कारणामुळे झाला हे अद्याप समोर आले नसले तरी या घटनेने पिंपरी चिंचवड शहर हादरले असल्याचे पाहायला मिळत आहे. या प्रकरणाचा अधिक तपास वाकड पोलिसांकडून केला जात आहे.