Pune : रुपाली चाकणकरांच्या अडचणी वाढल्या; रायगडशी संबंध उघड, प्रकरण काय?

 

Pune : रुपाली चाकणकर यांच्या अडचणीत भर; रायगड कनेक्शन उघड, ‘शिवनिका’ ट्रस्टवर SIT ची नजर नाशिकमधील भोंदूबाबा अशोक खरात प्रकरणामुळे आधीच अडचणीत आलेल्या रुपाली चाकणकर यांच्या समस्यांमध्ये आता आणखी भर पडताना दिसत आहे. या प्रकरणामुळे त्यांना महिला आयोगाच्या अध्यक्षपदाचा तसेच पक्षाच्या महिला प्रदेशाध्यक्षपदाचा राजीनामा द्यावा लागला होता. त्यानंतर आता रायगडमधील त्यांच्या व्यावसायिक संबंधांचा धक्कादायक खुलासा समोर आला आहे.                                                                                                         

ठाकरे गटाच्या नेत्या सुषमा अंधारे यांनी घेतलेल्या पत्रकार परिषदेत रुपाली चाकणकर आणि सुनील तटकरे यांच्यावर गंभीर आरोप करण्यात आले होते. या आरोपांना आता काही प्रमाणात पुष्टी मिळताना दिसत आहे. रायगडमधील रोहा येथे निलेश चाकणकर आणि आकाश चौधरी हे बांधकाम व्यवसायात भागीदार असल्याची माहिती समोर आली आहे.

‘कर्मा कन्स्ट्रक्शन LLP’च्या माध्यमातून रोठ खुर्द येथे उभारण्यात आलेल्या बहुमजली इमारतीवर अनधिकृत बांधकामाचे आरोप करण्यात आले आहेत. भाजप अल्पसंख्यांक सेलचे प्रदेश सचिव बबलू सय्यद यांनी याप्रकरणी माणगाव न्यायालयात याचिका दाखल केली आहे. त्यामुळे या व्यावसायिक संबंधांवर प्रश्नचिन्ह निर्माण झाले आहे.

दरम्यान, आकाश चौधरी यांच्या नावावर अनेक कंपन्यांची नोंदणी असल्याची माहितीही तपासातून पुढे आली आहे. यात ओशन पर्ल मेरिटाइम प्रा. लि., कोलाड आणि कर्जत रिव्हर राफ्टिंग, गीता ॲग्रो अँड इन्फ्रा प्रा. लि., FL3 हॉस्पिटॅलिटी आणि रॉक हिल ॲडव्हेंचर रिसॉर्ट यांसारख्या व्यवसायांचा समावेश आहे.

दुसरीकडे, अशोक खरात प्रकरणाचा तपास करणाऱ्या विशेष तपास पथकाने (SIT) आता ‘शिवनिका’ ट्रस्टच्या आर्थिक व्यवहारांकडे लक्ष केंद्रित केले आहे. या संस्थेच्या सर्व व्यवहारांची सखोल चौकशी सुरू असून, संबंधित आजी-माजी ट्रस्टींना समन्स बजावण्यात आल्याची माहिती समोर येत आहे.

या घडामोडींमुळे रुपाली चाकणकर यांच्या अडचणी वाढल्या असून त्या कायदेशीर कचाट्यात सापडण्याची शक्यता वर्तवली जात आहे. दरम्यान, या प्रकरणाचे राजकीय पडसादही उमटू लागले आहेत. पुण्यात आज सकाळी ११ वाजता गुलाबो गँगकडून रुपाली चाकणकर यांच्या विरोधात आंदोलन करण्यात येणार असून, तीव्र निदर्शने होण्याची शक्यता आहे.