Ratnagiri News: कोकणात दुर्दैवी घटना ! आरे-वारे बीचवर पोहताना तरुणाचा मृत्यू; एकाला वाचवण्यात यश

Tourist Drowns in Konkan:
सुट्ट्यांचा आनंद घ्यायला कोकणात गेलेल्या कुटुंबावर दुर्दैव कोसळलं आहे. रत्नागिरीतील आरे-वारे बीचवर समुद्रात पोहताना दोन पर्यटक बुडाल्याची घटना घडली. यापैकी एका तरुणाचा मृत्यू झाला असून दुसऱ्याला स्थानिकांच्या मदतीने सुखरूप वाचवण्यात आलं आहे.

 सध्या सुट्ट्यांमुळे कोकणात पर्यटकांची मोठी गर्दी पाहायला मिळत आहे. समुद्रकिनाऱ्यांवर मोठ्या प्रमाणात पर्यटकांची वर्दळ असताना दुर्घटनांचा धोका देखील वाढतो आहे. रविवारी सकाळी साडेनऊच्या सुमारास आरे-वारे बीचवर ही दुर्दैवी घटना घडली.

 

मिळालेल्या माहितीनुसार, पालघरहून आलेलं एक कुटुंब वीकेंडसाठी कोकणात फिरायला आलं होतं. सकाळी समुद्रकिनारी गेलेल्या कुटुंबातील दोन जण पोहण्यासाठी पाण्यात उतरले. मात्र, पाण्याचा अंदाज न आल्याने दोघेही बुडू लागले. स्थानिक ग्रामस्थ आणि पोलिस पाटील आदेश कदम यांच्या मदतीने तत्काळ बचावकार्य राबवण्यात आलं. त्यात एकाचा जीव वाचवण्यात यश आलं, तर दुर्दैवाने दुसऱ्या तरुणाचा मृत्यू झाला.

या घटनेमुळे कुटुंबावर शोककळा पसरली असून, सुट्टीचा आनंद दुःखात बदलला आहे.

दरम्यान, समुद्रकिनारी पर्यटन करताना पर्यटकांनी विशेष खबरदारी घेणं आवश्यक असल्याचं प्रशासन आणि स्थानिकांकडून आवाहन करण्यात येत आहे. पाण्याचा अंदाज घेणं, स्थानिकांच्या सूचनांचं पालन करणं आणि अतिसाहस टाळणं अत्यंत गरजेचं आहे.