Nashik : रुपाली चाकणकर दोन्ही पदांवरून गेल्या,चौकशीसाठी बोलावले जाण्याची शक्यता

Nashik : नाशिकमधील भोंदूबाबा अशोक खरात याच्या महिला अत्याचार प्रकरणाचा भांडाफोड झाल्यानंतर रुपाली चाकरणकर यांना राज्य महिला आयोगाच्या अध्यक्षपदासह राष्ट्रवादी काँग्रेसचे महिला प्रदेशाध्यक्षपदही गमवावं लागलं. अशोक खरातसोबत असलेल्या जवळीकीमुळे राजकीय नामुष्की ओढावलेली असतानाच आता रुपाली चाकणकर यांना आणखी एक धक्का बसण्याची शक्यता आहे. कारण अशोक खरात प्रकरणात विशेष तपास पथक अर्थात एसआयटीकडून कसून चौकशी केली जात आहे. अशातच खरात आणि त्याच्या शिवनिका संस्थानशी संबंधित आर्थिक गैरव्यवहार प्रकरणाचा तपास आता अधिक व्यापक होत चालला असून या संस्थेच्या सर्व आजी-माजी सदस्यांची आता चौकशी होणार असल्याची माहिती पुढे येत आहे. विशेष म्हणजे या चौकशीच्या फेऱ्यात राज्य महिला आयोगाच्या माजी अध्यक्षा रुपाली चाकणकर यांचीही SIT कडून चौकशी होण्याची शक्यता वर्तवण्यात येत आहे.

शिवनिका संस्थांच्या माध्यमातून करण्यात आलेले सर्व आर्थिक व्यवहार आणि संशयास्पद गुंतवणुकीची कागदपत्रे देखील विशेष पोलीस तपास पथकाच्या रडारवर आहेत. या संस्थांमध्ये आजवर कोण कोण सदस्य होते, कोणाच्या काळात कोणते निर्णय घेण्यात आले? याची देखील सखोल माहिती तपास पथकाने गोळा करण्यास सुरुवात केली आहे. त्यामुळे लवकरच सर्व आजी माजी सदस्यांना चौकशीसाठी बोलावले केले जाणार असल्याचे समजते आहे. त्यामुळे या संस्थानच्या मंडळात सदस्य राहिलेल्या रुपाली चाकणकर यांनाही चौकशीसाठी बोलावले जाईल, अशी माहिती आहे.

मुख्य संशयित अशोक खरात याची आज पोलिस कोठडी संपल्यानंतर त्याला आज दुपारी १२ वाजेच्या सुमारास नाशिक जिल्हा व सत्र न्यायालय येथे हजर करण्यात आलं. या सुनावणी दरम्यान न्यायालयाने खरातला ३ दिवसांची पोलिस कोठडी सुनावली आहे.

दरम्यान, अशोक खरात याच्या अटकेनंतर या प्रकरणाचे धागेदोरे राजकीय वर्तुळापर्यंत पोहोचत असल्याने नाशिकसह संपूर्ण राज्यात या तपासाबाबत कमालीची उत्सुकता निर्माण झाली असून या प्रकरणाच्या तपासात आगामी काळात नेमके काय धागेदोरे उलगडतात, हे पाहणं महत्त्वाचं ठरणार आहे.