Yawatmal Accident News : ह्रदयद्रावक! भरधाव ट्रकची दुचाकीला धडक; दोन तरुणांचा जागीच मृत्यू

Yawatmal Latest News: यवतमाळच्या वणी येथील लालपुलियाजवळ भीषण अपघात होऊन त्यात दोन तरुण जागीच ठार झाल्याची दुर्देवी घटना समोर आली आहे. भरधाव ट्रकने धडक दिल्याने हा अपघात झाला असून परिसरात हळहळ व्यक्त केली जात आहे. 

याबाबत अधिक माहिती अशी की, यवतमाळच्या वणी येथील लालपुलियाजवळ ट्रक आणि दुचाकीमध्ये भीषण अपघात झाला. भरधाव ट्रकने धडक दिल्यामुळे दुचाकीस्वाराचे नियंत्रण सुटून दोघेही ट्रकच्या मागील चाकात येऊन चिरडले गेले. यामध्ये दुचाकीस्वार आणि मागे बसलेल्या तरुणाचा दुर्देवी मृत्यू झाला. 

हा अपघात एवढा भीषण होता की यात ट्रकच्या चाकाखाली आलेल्या तरुणांचा अक्षरशः चेंदामेंदा झाला. अपघाताची माहिती मिळताच तरुणाचे नातेवाईक घटनास्थळी दाखल झाले. तसेच संतप्त नातेवाईकांनी ट्रकच्या काचा फोडल्याचे समोर आले. त्यामुळे घटनास्थळी काही काळ तणावाचे वातावरण निर्माण झाले होते. या दुर्देवी अपघाताने परिसरात हळहळ व्यक्त केली जात आहे.

दरम्यान, काल नांदेड मधूनही अशीच दुर्देवी घटना समोर आली होती. भोकर येथे लग्न आटोपून घराकडे परतताना भोकर - नांदेड मार्गावर भरधाव ट्रकने दुचाकीला धडक दिली. या धडकेत दोन तरुणांचा जागीच मृत्यू झाला. या मन सुन्न करणाऱ्या घटनेने परिसरात हळहळ व्यक्त केली जात आहे.