Beed Crime adhikari dead case

Beed : संपूर्ण जिल्हा हादरवून सोडणाऱ्या वस्तू व सेवा कर विभागाचे अधिकारी सचिन नारायण जाधवर यांच्या आत्महत्या प्रकरणात बीड पोलिसांना मोठं यश मिळालं आहे. या प्रकरणातील मुख्य आरोपी आणि वरिष्ठ अधिकारी प्रदीप फाटे याला बीड स्थानिक गुन्हे शाखेने पुणे येथील वाघोली परिसरातून बेड्या ठोकल्या आहेत. गुन्हा दाखल झाल्यापासून गेल्या 40 दिवसांपासून फाटे फरार होता.

प्रकरणाची पार्श्वभूमी
16 जानेवारी 2026 रोजी सचिन जाधवर कर्तव्यावर जातो असं सांगून घरातून बाहेर पडले होते, मात्र ते परतले नाहीत. 17 जानेवारी रोजी मांजरसुंबा घाटातील कपिलधारवाडी फाट्याजवळ त्यांच्याच कारमध्ये त्यांचा मृतदेह आढळून आला होता. या घटनेनंतर जाधवर यांच्या पत्नी मयुरी जाधवर यांनी वरिष्ठ अधिकारी प्रदीप फाटे यांच्यावर गंभीर आरोप केले. फाटे हे अतिरिक्त पदभाराचा वापर करून सचिन यांचा मानसिक छळ करत होते, कार्यालयात त्यांचा अपमान करणे आणि काही विशिष्ट कंपन्यांची बेकायदेशीर कामे करण्यासाठी त्यांच्यावर दबाव टाकत असल्याचा आरोप मयुरी जाधववर यांनी केला.

अटकपूर्व जामीन फेटाळला होता
मयुरी जाधवर यांच्या जबाबानंतर 23 जानेवारी रोजी बीड ग्रामीण पोलीस ठाण्यात गुन्हा दाखल करण्यात आला. गुन्हा नोंद होताच प्रदीप फाटे फरार झाला होता. त्याने अटकेपासून वाचण्यासाठी न्यायालयात धाव घेऊन अटकपूर्व जामिनासाठी अर्ज केला होता, मात्र न्यायालयाने या प्रकरणाचे गांभीर्य ओळखून त्याचा अर्ज फेटाळून लावला. आरोपी अटक होत नसल्याने पोलीस प्रशासनावर टीकेची झोड उठत होती.

कुटुंबीयांचे उपोषण आणि पोलिसांची कारवाई
आरोपीला तात्काळ अटक करावी या मागणीसाठी मृत सचिन जाधवर यांच्या कुटुंबीयांनी 25 फेब्रुवारी रोजी पोलीस अधीक्षक कार्यालयासमोर उपोषण केले. होते. प्रसारमाध्यमांनीही हे प्रकरण लावून धरल्यामुळे पोलीस यंत्रणेवर मोठा दबाव निर्माण झाला होता. अखेर पोलीस अधीक्षक नवनीत कांवत यांच्या मार्गदर्शनाखाली स्थानिक गुन्हे शाखेने विशेष पथक तयार केले. तांत्रिक विश्लेषणाच्या आधारे फाटे पुण्यात असल्याची माहिती मिळताच, पथकाने वाघोली येथे छापा टाकून त्याला जेरबंद केले. ही कारवाई अप्पर पोलीस अधीक्षक सचिन पांडकर, स्थानिक गुन्हे शाखेचे पोलीस निरीक्षक बंटेवाड, सपोनी बाळराजे दराडे, अशोक दुबाले आणि महेश विघ्ने यांच्या पथकाने यशस्वीरित्या पार पाडली. प्रदीप फाटेच्या अटकेमुळे आता या प्रकरणातील अनेक धक्कादायक बाबी समोर येण्याची शक्यता वर्तवण्यात येत आहे.