48 नेते, 40 कमांडर, 9 युद्धनौका…; इराणचे प्रचंड नुकसान, 48 तासांच्या युद्धात काय काय घडले?

अमेरिका आणि इस्रायलने इराणविरुद्ध चालवलेल्या आक्रमक लष्करी मोहिमेमुळे मध्यपूर्वेतील परिस्थिती अत्यंत स्फोटक बनली आहे. या संयुक्त कारवाईत इराणचे प्रचंड नुकसान झाले आहे. गेल्या ४८ तासांतच ४८ प्रमुख इराणी नेते आणि ४० महत्त्वाचे लष्करी कमांडर ठार मारल्याचा दावा करण्यात येत आहे. इराणचे सर्वोच्च नेते आयातुल्ला अली खामेनेई यांच्या मृत्यूनंतर आता इस्त्रालय आणि अमेरिकेने इराणविरुद्ध बंड पुकारले आहे.

डोनाल्ड ट्रम्प यांचा दावा काय?

अमेरिकेचे अध्यक्ष डोनाल्ड ट्रम्प यांनी फॉक्स न्यूजला एक विशेष मुलाखत दिली आहे. या मुलाखतीत त्यांनी इराणमध्ये किती नुकसान झाले याची माहिती दिली आहे. सध्या खूप वेगवान घडामोडी होत आहेत. यात आम्हाला प्रचंड यश मिळाले आहे. आम्ही केलेल्या केवळ एकाच हल्ल्यात ४८ प्रमुख इराणी नेत्यांना ठार केले आहे, असा दावा डोनाल्ड ट्रम्प यांनी केला आहे.

सध्या अमेरिकन सैन्य इराणच्या नौदलाला निष्क्रिय करण्यासाठी काम करत आहे. आतापर्यंत आम्हाला इराणच्या ९ युद्धनौका बुडवण्यात यश आले आहे. या हल्ल्यात इराणी नौदल मुख्यालयाचेही प्रचंड नुकसान झाले आहे, असाही दावा ट्रम्प यांनी केला आहे.

शेकडो क्षेपणास्त्रे आणि ड्रोनद्वारे हल्ला

इस्रायली संरक्षण दलाने (IDF) दिलेल्या माहितीनुसार, या कारवाईत इराणच्या लष्करी नेतृत्वाला लक्ष्य करण्यात आले आहे. यात इराणचे चीफ ऑफ स्टाफ अब्दुलरहीम मौसावी यांचा मृत्यू झाल्याची माहिती IDF ने दिली आहे. इराणच्या लष्करी संरचनेत मौसावी हे अत्यंत महत्त्वाचे पद भूषवत होते. इराणने अमेरिकन आणि इस्रायली हल्ल्यांना प्रत्युत्तर म्हणून शेकडो क्षेपणास्त्रे आणि ड्रोनद्वारे हल्ला चढवला. या संघर्षात अमेरिकेलाही मोठी किंमत मोजावी लागली आहे. इराणच्या हल्ल्यात आतापर्यंत ३ अमेरिकन सैनिक मारले गेले असून ५ जण गंभीर जखमी झाले आहेत, अशी माहिती अमेरिकन लष्कराने दिली आहे.

दरम्यान हा संघर्ष आता इराण-इस्रायलपुरता मर्यादित न राहता त्याची झळ संपूर्ण मध्य पूर्वेतील देशांना बसत आहे. इराणच्या क्षेपणास्त्रांकडून युएई, कतार, सौदी अरेबिया, कुवेत, बहरीन आणि जॉर्डन यांसारख्या अमेरिकेच्या मित्रराष्ट्रांना टार्गेट करण्यात आले आहे. इराणच्या रिव्होल्युशनरी गार्ड्सने केलेल्या दाव्यानुसार, इराणने अमेरिकन विमानवाहू जहाज यूएसएस अब्राहम लिंकनवर चार बॅलिस्टिक क्षेपणास्त्रे डागली आहेत. मात्र, अमेरिकन सेंट्रल कमांडने हा दावा फेटाळून लावला आहे. सध्या ही युद्धनौका पूर्णपणे सुरक्षित आणि कार्यरत असल्याचे स्पष्ट केले आहे.