Pune : पुण्यात भीषण दुर्घटना! क्रेनचा पट्टा तुटून सळई डोक्यावर कोसळली; कामगार महिलेचा दुर्दैवी मृत्यू

Pune : हडपसर येथील रामटेकडी औद्योगिक वसाहतीत लोखंडी जिना उभारणीचे काम सुरू असताना क्रेनचा पट्टा अचानक तुटल्याने उचललेली सळई एका महिला कामगाराच्या डोक्यात पडली. त्यात महिला गंभीर जखमी होऊन तिचा मृत्यू झाला. या अपघातप्रकरणी वानवडी पोलिसांनी क्रेनचालक आणि ठेकेदाराविरुद्ध गुन्हा दाखल केला आहे.

वैशाली मारुती भोसले (वय ४७, रा. गोसावी वस्ती, हडपसर) असे मृत्युमुखी पडलेल्या महिलेचे नाव आहे. या प्रकरणी त्यांचा मुलगा चेतन मारुती भोसले (२१) याने वानवडी पोलिस ठाण्यात तक्रार दिली आहे.

पोलिसांनी दिलेल्या माहितीनुसार, रामटेकडी औद्योगिक वसाहतीतील एका खासगी कंपनीच्या आवारात लोखंडी जिना तयार करण्याचे काम सुरू होते. १८ फेब्रुवारीला सकाळी वैशाली आणि सहकारी पिण्याचे पाणी आणण्यासाठी कंपनीच्या आवारातून निघाल्या असताना क्रेनद्वारे लोखंडी सळई उचलण्याचे काम सुरू होते. अचानक क्रेनचा पट्टा तुटल्याने उचललेली सळई थेट वैशाली यांच्या डोक्यावर कोसळली. गंभीर जखमी झालेल्या त्यांना खासगी रुग्णालयात दाखल करूनही उपचारांपूर्वीच डॉक्टरांनी त्यांना मृत घोषित केले.

वानवडी पोलिसांनी घटनास्थळी पाहणी केली. प्राथमिक चौकशीत क्रेनचालक आणि ठेकेदारांनी आवश्यक सुरक्षाविषयक उपाययोजना न केल्याचे आढळले. कामाच्या ठिकाणी सुरक्षिततेच्या नियमांकडे दुर्लक्ष झाल्यामुळेच ही दुर्घटना घडल्याचे पोलिसांचे म्हणणे आहे.