पुण्याचे प्रसिद्ध ज्येष्ठ हृदयरोगतज्ज्ञ डॉ. शिरीष हिरेमठ यांचे वयाच्या ७५ व्या वर्षी निधन; चाळीस वर्षांच्या प्रदीर्घ सेवेचा आणि हजारो यशस्वी शस्त्रक्रियांचा प्रवास थंडावला!

पुण्यातील वैद्यकीय जगतात आणि संपूर्ण राज्यभरात आपल्या अलौकिक कर्तृत्वाने आणि कुशल हातानं ओळखले जाणारे प्रसिद्ध ज्येष्ठ व प्रथितयश हृदयरोगतज्ज्ञ (Cardiologist), 'कार्डिऑलॉजिकल सोसायटी ऑफ इंडिया'चे माजी अध्यक्ष आणि रुबी हॉल क्लिनिकच्या कार्डियाक कॅथ लॅबचे संचालक डॉ. शिरीष (एम. एस.) हिरेमठ (वय ७५, रा. सोपान बाग, पुणे) यांचे गुरुवारी रात्री नऊच्या सुमारास राहत्या घरी अल्पशा आजाराने निधन झाले. त्यांच्या निधनामुळे पुण्यासह देशातील वैद्यकीय क्षेत्रात एक पोकळी निर्माण झाली असून सर्वत्र शोककळा पसरली आहे.

चार दशकांचा प्रदीर्घ वैद्यकीय प्रवास आणि मोलाचे योगदान:

गेली चाळीस वर्षेाहून अधिक काळ हृदयविकार उपचारांच्या क्षेत्रात त्यांनी निष्ठेने सेवा बजावली. पुण्यात १९८९ मध्ये पहिली अँजिओप्लास्टी यशस्वीपणे पार पाडण्यापासून ते अत्याधुनिक तंत्रज्ञान रुजवण्यापर्यंत त्यांचे योगदान अत्यंत महत्त्वाचे ठरले. आपल्या कारकिर्दीत त्यांनी ४० हजारांहून अधिक अँजिओप्लास्टी आणि सुमारे एक लाखांहून अधिक अँजिओग्राफी अत्यंत यशस्वीपणे पार पाडल्या होत्या. पुण्यासह देशभरातून तसेच परदेशातूनही अनेक रुग्ण उपचारांसाठी त्यांच्याकडे येत असत.

अत्यंत गुंतागुंतीच्या प्रक्रियांमध्ये होती हातोटी:

रुग्णांच्या उपचारांसाठी ते कॅथ लॅबमध्ये सलग अनेक तास अत्यंत तन्मयतेने काम करत असत. हृदयरोगांचे प्रतिबंध, लवकर निदान आणि उपचाराबाबत सर्वसामान्य नागरिकांमध्ये जनजागृती करण्यात त्यांनी नेहमीच पुढाकार घेतला. हृदयविकाराच्या झटक्यावरील उपचारांमध्ये औषधोपचार आणि रक्तवाहिनीविषयक प्रक्रियेचा एकत्रित (Pharmaco-invasive approach) वापर लोकप्रिय करण्यात त्यांचे मोठे योगदान होते. त्यांच्या निधनाने वैद्यकीय क्षेत्रातील एक अनुभवी, मार्गदर्शक आणि सेवाभावी व्यक्तिमत्त्व काळाच्या पडद्याआड गेल्याची भावना महाराष्ट्रभरातील डॉक्टर्स व नागरिकांकडून व्यक्त होत आहे.