मुंबई: विकासाच्या प्रत्येक प्रकल्पाला विरोध करणे हाच विरोधकांचा एकमेव अजेंडा राज्यमंत्री माधुरी मिसाळ यांचा विरोधकांवर जोरदार हल्लाबोल!

मुंबई: महाराष्ट्रात महायुती सरकारकडून राबवल्या जाणाऱ्या विविध विकासकामांना आणि पायाभूत सुविधांच्या प्रकल्पांना विरोध करणाऱ्या विरोधी पक्षांवर राज्यमंत्री माधुरी मिसाळ यांनी तिखट शब्दांत ताशेरे ओढले आहेत. "महाराष्ट्रात कोणताही नवीन विकास प्रकल्प आणला की त्याला विरोध करायचा, स्थानिकांची दिशाभूल करून आंदोलने पेटवायची आणि दुर्दैवाने एखादा प्रकल्प राज्याबाहेर गेला की त्यावर सरकारला दोष देऊन टीका करायची, हीच विरोधकांची दुटप्पी नीती बनली आहे," असा घणाघाती आरोप राज्यमंत्री माधुरी मिसाळ यांनी प्रसारमाध्यमांशी बोलताना केला.

आपली बाजू मांडताना माधुरी मिसाळ म्हणाल्या की, यापूर्वी मुंबईतील 'आरे मेट्रो कारशेड', 'कोस्टल रोड', 'कनेक्टिंग लिंक' आणि 'अटल सेतू' (Atal Setu) यांसारख्या अत्यंत महत्त्वाच्या आणि लोकांच्या सोयीच्या प्रकल्पांनाही विरोधकांनी तीव्र विरोध केला होता. मात्र, हे प्रकल्प पूर्ण झाल्यानंतर आज दळणवळणाची आणि वाहतुकीची किती मोठी सोय नागरिकांना उपलब्ध झाली आहे, हे सर्वांसमोर आहे. महाराष्ट्राच्या भविष्यातील वाढत्या गरजा पूर्ण करण्यासाठी आणि संभाव्य विजेचा तुटवडा टाळण्यासाठी राज्य सरकारला नवीन वीज प्रकल्प हाती घेणे अत्यंत गरजेचे आहे.

प्रस्तावित 'टोरंट वीज प्रकल्पा'बाबत बोलताना त्यांनी स्पष्ट केले की, हा प्रकल्प पूर्णपणे 'ग्रीन प्रोजेक्ट' (Green Project) आहे. यामध्ये कोळशाचा वापर करून वीजनिर्मिती केली जाणार नाही. त्यामुळे कोळशामुळे निर्माण होणाऱ्या कार्बन डायऑक्साइडचे (CO2) उत्सर्जन कित्येक पटीने कमी होण्यास मदत होईल. या प्रकल्पाला सर्व संबंधित शासकीय विभागांच्या परवानग्या मिळाल्यानंतरच वनखात्याची जमीन देण्यात आली आहे. प्रकल्पासाठी एक झाड तोडल्यास त्याच्या बदल्यात अनेक नवीन झाडे लावून पर्यावरणाचा समतोल राखण्याचा सरकारचा ठाम मानस आहे. विरोधक आणि काही संस्था पर्यावरणवाद्यांना चुकीचे चित्र दाखवून त्यांची दिशाभूल करत आहेत. सरकार त्यांच्याशी सविस्तर चर्चा करून या प्रकल्पाचे महत्त्व आणि महाराष्ट्राला होणारा फायदा समजवून सांगेल, ज्यामुळे ते नक्कीच सहकार्य करतील, असा विश्वास त्यांनी व्यक्त केला.

याशिवाय, नुकत्याच पार पडलेल्या 'पुणे विभाग पदवीधर आणि शिक्षक मतदारसंघ' निवडणुकीवर भाष्य करताना त्यांनी भाजपच्या विजयाचा ठाम दावा केला. महायुती आणि भाजपने या निवडणुकीत तळागाळातील लोकांपर्यंत पोहोचून अत्यंत नियोजनबद्ध प्रचार केला आहे. ही निवडणूक आमच्यासाठी केवळ प्रतिष्ठेची नसून प्रत्यक्ष केलेल्या कामांची पावती आहे. त्यामुळे पदवीधर आणि शिक्षक या दोन्ही जागांवर भारतीय जनता पक्षाचा शंभर टक्के विजय निश्चित आहे, असे राज्यमंत्री माधुरी मिसाळ यांनी ठामपणे सांगितले.