मुंबई: टायगर श्रॉफ गोळीबार प्रकरण ९वीत नापास, वेल्डिंगचे काम अन् जुना गुन्हेगारी रेकॉर्ड; असा आहे शार्प शूटर रेहानचा प्रवास!

मुंबई: बॉलीवूड अभिनेता टायगर श्रॉफच्या कारवर जुहू परिसरात झालेल्या सनसनाटी गोळीबार प्रकरणातील आरोपींबाबत रोज नवीन आणि खळबळजनक माहिती समोर येत आहे. मुंबई पोलिसांनी राजस्थानमधील कोटा रेल्वे स्थानकावर केलेल्या धडक कारवाईत या प्रकरणातील तीन संशयित आरोपींना अटक केली आहे, ज्यामध्ये उत्तर प्रदेश, बिहार आणि हरियाणा येथील तरुणांचा समावेश आहे. यातील मुख्य शूटर म्हणून नाव समोर आलेला रेहान हा हरियाणाच्या सोनीपत येथील रहिवासी असून, त्याची पार्श्वभूमी आणि गुन्हेगारी कुंडली आता उघडकीस आली आहे.

मिळालेल्या सविस्तर माहितीनुसार, गोळीबार प्रकरणातील संशयित शूटर रेहान याने नववी इयत्तेत नापास झाल्यानंतर शाळा सोडली होती. त्यानंतर तो उपजीविकेसाठी वेल्डिंगचे काम करू लागला होता. परंतु, काही कालावधीतच तो चुकीच्या संगतीत पडला आणि गुन्हेगारी जगाच्या आहारी गेला. त्याच्यावर यापूर्वीही शस्त्र कायद्यान्वये (Arms Act) गुन्हा दाखल असून तो तुरुंगामध्ये जाऊन आला होता. तुरुगांतून सुटल्यानंतर त्याने काही काळ वेल्डिंगचे काम केले, मात्र पैशाच्या मोहात आणि गुन्हेगारी टोळ्यांच्या संपर्कात आल्यामुळे तो पुन्हा गंभीर गुन्ह्यांमध्ये सक्रिय झाला.

कुटुंबीयांची प्रतिक्रिया आणि पोलिसांची कारवाई: रेहानच्या वडिलांनी व त्याच्या नातेवाईकांनी मीडियाशी बोलताना सांगितले की, रेहान काही दिवसांपूर्वीच घर सोडताना गुरुग्राममध्ये वेल्डिंगचे काम मिळाले असल्याचे सांगून बाहेर पडला होता. बकरीदच्या सणासाठी तो घरी आला होता आणि सण संपल्यानंतर कामावर जात असल्याचे सांगून गेला होता. तो मुंबईतील या मोठ्या गोळीबाराच्या घटनेत सहभागी होईल, याची कल्पना त्याच्या कुटुंबीयांनाही नव्हती. त्याच्या कृत्यामुळे कुटुंबाला मोठा धक्का बसला असून, त्याने गुन्हा केला असेल तर त्याला नियमानुसार कठोर शिक्षा झाली पाहिजे, अशी भावना त्याच्या कुटुंबीयांनी व्यक्त केली आहे.

दरम्यान, टायगर श्रॉफच्या कारवर गोळीबार केल्यानंतर हे सर्व आरोपी नेपाळमध्ये पळून जाण्याच्या तयारीत होते. पुणे-जयपूर सुपरफास्ट एक्स्प्रेसमधून दिल्ली किंवा अन्य राज्यांच्या मार्गाने पळून जाण्याचा त्यांचा प्लॅन होता. मात्र, मुंबई पोलीस आणि राजस्थान पोलिसांनी अत्यंत वेगाने संयुक्त सापळा रचून अवघ्या १५ मिनिटांच्या आत कोटा स्टेशनवर त्यांना जेरबंद केले. या प्रकरणात आता मुंबई गुन्हे शाखा (Crime Branch) अधिक सखोल तपास करत असून यामागील मास्टरमाइंड आणि लॉरेन्स बिश्नोई किंवा इतर गँगच्या कनेक्शनचा पर्दाफाश केला जात आहे.