भंडारा: पालकमंत्र्यांसमोर डोळ्यात पाणी आणून व्यथा मांडणाऱ्या हतबल शेतकऱ्याची विहिरीत उडी घेऊन आत्महत्या!

भंडारा: जिल्ह्यातून एक अत्यंत हृदयद्रावक आणि संतापजनक घटना समोर आली आहे. पालकमंत्री डॉ. पंकज भोयर यांच्या ३ ऑक्टोबर रोजी झालेल्या दुष्काळी पाहणी दौऱ्यात, मंत्र्यांसमोर डोळ्यात पाणी आणून आपल्या शेतीची आणि संकटांची व्यथा मांडणाऱ्या एका शेतकऱ्याने अखेर टोकाचे पाऊल उचलले आहे. मोहाडी तालुक्यातील धोप येथील या शेतकऱ्याने गुरुवारी (८ ऑक्टोबर) सकाळी गावातीलच विहिरीत उडी घेऊन आपली जीवनयात्रा संपवली. राजेंद्र अमर सपाटे (वय ४५ वर्षे) असे आत्महत्या केलेल्या दुर्दैवी शेतकऱ्याचे नाव आहे. या घटनेमुळे संपूर्ण भंडारा जिल्ह्यात मोठी खळबळ उडाली असून शेतकरी वर्गात तीव्र संताप व शोककळा पसरली आहे.

नेमकी घटना काय घडली? काही दिवसांपूर्वी भंडारा जिल्ह्यात भीषण दुष्काळ आणि अनियमित पावसामुळे झालेल्या धान पिकांच्या नुकसानाची पाहणी करण्यासाठी पालकमंत्री डॉ. पंकज भोयर यांनी मोहाडी तालुक्यातील धोप, हिवरा, जाम व कांद्री आदी गावांचा दौरा केला होता. या दौऱ्यादरम्यान धोप येथील शेतकरी राजेंद्र अमर सपाटे यांनी पालकमंत्री डॉ. पंकज भोयर यांच्यासमोर प्रत्यक्ष जात आपल्या डोळ्यात पाणी आणून शेतीपिकांच्या नुकसानीची आणि कुटुंबावर आलेल्या आर्थिक संकटाची कैफियत मांडली होती. मात्र, अस्मानी संकटाने व कर्जबाजारीपणाने घेरलेल्या राजेंद्र सपाटे यांना या त्रासातून कोणताही दिलासा मिळाला नाही, असे दिसून आले. गुरुवारी (८ ऑक्टोबर) सकाळी त्यांनी टोकाचे पाऊल उचलत गावातील विहिरीत उडी घेतली.

गावकऱ्यांमध्ये तीव्र संताप आणि हळहळ: राजेंद्र सपाटे यांनी विहिरीत उडी घेतल्याचे लक्षात येताच गावकऱ्यांनी तात्काळ घटनास्थळी धाव घेतली आणि त्यांना बाहेर काढण्याचे प्रयत्न केले. मात्र तोपर्यंत उशीर झाला होता. या घटनेची माहिती मिळताच पोलिसांनी तात्काळ घटनास्थळी धाव घेऊन पंचनामा सुरू केला आहे आणि मृतदेह शवविच्छेदनासाठी पाठवला आहे.

राजकीय वर्तुळातून तीव्र प्रतिक्रिया: शेतकऱ्याच्या या आत्महत्येचे वृत्त बाहेर येताच संपूर्ण जिल्ह्यात संतप्त प्रतिक्रिया उमटू लागल्या आहेत. गावामध्ये सध्या संतापाचे आणि तणावाचे वातावरण निर्माण झाले आहे. या दुर्दैवी घटनेवर प्रतिक्रिया देताना माजी आमदार तथा राष्ट्रवादी काँग्रेस शरद पवार गटाचे जिल्हाध्यक्ष चरण वाघमारे यांनी तीव्र शब्दांत संताप व्यक्त केला आहे. ते म्हणाले की, "शेतकऱ्यांच्या दुःखाची आणि व्यथांची किंमत त्यांच्या मृत्यूनंतर सरकार मोजणार असेल, तर हे अत्यंत वेदनादायी आणि दुर्दैवी आहे." प्रशासनाचे दुर्लक्ष आणि अस्मानी संकटामुळे बळीराजा एकामागून एक टोकाची पावले उचलत असल्याने नागरिकांमधून तीव्र रोष व्यक्त होत आहे.