दाम्पत्य रस्ता चुकले, जिवाला मुकले! गोवा बांबोळी महामार्गावर कारची दुचाकीला जोरदार धडक; वृद्ध पती-पत्नीचा दुर्दैवी मृत्यू

पणजी/गोवा : गोवा येथील राष्ट्रीय महामार्गावर बांबोळी (Bambolim) जवळील इनडोअर आणि ॲथलेटिक स्टेडियमजवळ सोमवारी पहाटे एक अत्यंत भीषण आणि हृदयद्रावक अपघात झाला आहे. रस्ता चुकल्यामुळे महामार्गावर विरुद्ध दिशेने म्हणजेच चुकीच्या बाजूने (Wrong Side) प्रवास करणाऱ्या एका वृद्ध दाम्पत्याच्या स्कूटरला भरधाव कारने समोरासमोर जोरदार धडक दिली. या भीषण अपघातात पती-पत्नी दोघांचाही उपचारादरम्यान मृत्यू झाला. या दुर्दैवी घटनेमुळे संपूर्ण परिसरात तीव्र हळहळ व्यक्त केली जात आहे.

हॉस्पिटलला जाताना चुकली वाट पोलिसांनी दिलेल्या माहितीनुसार, साल्वादोर रेमेझिओ फर्नांडिस (वय ८०) आणि पावलिना फातिमा फर्नांडिस (वय ७५, रा. साल्वादोर द मुंद, पर्वरी) अशी या अपघातात प्राण गमावलेल्या वृद्ध पती-पत्नीची नावे आहेत. सोमवारी पहाटे ४:३० वाजण्याच्या सुमारास हे दाम्पत्य पर्वरीहून बांबोळी येथील गोवा वैद्यकीय महाविद्यालय इस्पितळात (गोमेकॉ - GMC) जाण्यासाठी निघाले होते. मात्र, पहाटेच्या अंधारात दुचाकी चालक साल्वादोर हे रस्ता चुकले. आपण चुकीच्या मार्गावर आल्याचे लक्षात आल्यावर त्यांनी गाडी फिरवली, मात्र ते महामार्गावरूनच विरुद्ध दिशेने (उलट्या बाजूने) जाऊ लागले.

कारची जोरदार धडक आणि मृत्यू याच दरम्यान पणजीहून मडगावच्या दिशेने एक भरधाव कार चालली होती. महामार्गावर उलट्या दिशेने येणारी स्कूटर कार चालकाच्या लक्षात आली नाही आणि कारने स्कूटरला थेट समोरून उडवले. धडक इतकी जोरात होती की दोघेही रस्त्यावर फेकले गेले आणि गंभीर जखमी झाले. घटनेची माहिती मिळताच आगशी पोलीस ठाण्याचे निरीक्षक अनंत गावकर यांच्या मार्गदर्शनाखाली सहाय्यक उपनिरीक्षक उल्हास गावकर यांनी घटनास्थळी धाव घेतली. जखमी दाम्पत्याला तातडीने 'गोमेकॉ' रुग्णालयात दाखल करण्यात आले, मात्र उपचार सुरू असतानाच या दोघांनीही अखेरचा श्वास घेतला.

दोन दिवसांत तीन मृत्यू झाल्याने नागरिकांमध्ये संताप आगशी पोलिसांनी कार चालकाविरुद्ध हलगर्जीपणाचा आणि बेजबाबदार ड्रायव्हिंगचा गुन्हा दाखल केला असून महिला उपनिरीक्षक दीपिका परमार या प्रकरणाचा पुढील तपास करत आहेत. धक्कादायक बाब म्हणजे, अवघ्या दोन दिवसांपूर्वी म्हणजेच शनिवारी याच भागात अशाच एका अपघातात कारने स्कूटरला धडक दिली होती, ज्यात एकाचा जागीच मृत्यू झाला होता. दोन दिवसांच्या आत बांबोळी महामार्गावर एकाच पॅटर्नमध्ये ३ जणांचा बळी गेल्यामुळे स्थानिक नागरिकांमध्ये तीव्र संताप आणि हायवेवरील सुरक्षेबाबत भीतीचे वातावरण पसरले आहे.