मुंबई: रुग्णवाहिका वेळेवर न आल्याने कुर्ल्यात घरीच झाली प्रसूती, प्रसूतीनंतर महिलेला चादरीतून झोळी करून नेण्याची आली वेळ!

मुंबई: कुर्ला परिसरात घरच्यांच्या धाडसामुळे गर्भवती महिला आणि तिच्या नवजात बाळाचा जीव वाचला. २२ वर्षीय महिलेची पहाटे अचानक प्रसूतीवेदना सुरू झाल्यानंतर घरातच (Mumbai News) प्रसूती झाली. महिलेने एका मुलाला जन्म दिला. बाळाचं वजन सुमारे २ किलो ४०० ग्रॅम आहे. मात्र प्रसूतीनंतर नाळ बाहेर न आल्याने महिलेला तातडीने रुग्णालयात नेण्याची गरज होती. नातेवाईकांकडून रुग्णवाहिकेसाठी संपर्क करण्यात आला, मात्र रुग्णवाहिका वेळेत न आल्याने, परिस्थिती गंभीर होत असल्याने नातेवाईकांनी महिलेला चादरीची झोळी करून त्यातून डॉ. आनंदीबाई जोशी प्रसूतिगृहात दाखल केलं. 

रुग्णालयात पोहोचताच ड्युटीवरील स्टाफ नर्सने बाळाची नाळ कापली. त्यानंतर स्त्रीरोगतज्ज्ञांनी पहाटे सुमारे ५ वाजून १० मिनिटांनी आवश्यक वैद्यकीय प्रक्रिया करून नाळेसह वार बाहेर काढली. सध्या माता आणि बाळाची प्रकृती स्थिर असून दोघांनाही वैद्यकीय निरीक्षणाखाली ठेवण्यात आलं आहे. दरम्यान, मुंबई महापालिका आरोग्य समितीचे अध्यक्ष हरिष भांदिर्गे यांनी रुग्णालयात जाऊन संपूर्ण घटनेचा आढावा घेतला. डॉक्टर, वैद्यकीय कर्मचाऱ्यांशी चर्चा करून रुग्णाच्या नातेवाईकांकडूनही माहिती घेतली. रुग्णालयातील डॉक्टरांकडून मदत न मिळाल्याचा आरोपही करण्यात आला असून, या संपूर्ण प्रकरणाची चौकशी करण्याची मागणी करण्यात आली आहे. 

 किशोरी पेडणेकरांनी व्यक्त केला संताप
तर या घटनेबाबत शिवसेना ठाकरे गटाच्या नेत्या किशोरी पेडणेकर यांनी प्रतिक्रिया देताना म्हटलं की, "मी निषेध करते अशा गोष्टीचा. प्रशासनाचा निषेध करते. त्याच्यावरती असलेले MC, त्याच्यावरती असलेले DMC झोपा काढतायत का? असा माझा प्रतीसवाल आहे. काय करताय तुम्ही? तुमचे डीन आहेत, तुमचे अनेक पदं तिथे नुसती शोभेसाठी भरली आहेत का? काय अवस्था करून ठेवलीय ! झोळीमधून! मग माझा महाराष्ट्र सरकारला पण एक प्रतीसवाल... की जे मंत्री महोदय आहेत, जे अख्ख्या महाराष्ट्राचं नेतृत्व... काय करताय काय तुम्ही? आम्ही तुमच्याकडे पत्र पाठवून वेळ मागतोय, तुम्हाला वेळ देता येत नाही. मग तुम्ही... आणि खूप बदल घडलेत. या नर्सिंग ट्रेनिंगच्या गोष्टी किंवा नर्सेस कशा कमी करायच्या, ज्या लोकांनी कोविड काळात म्हणा किंवा जेव्हा कधी पण... जेव्हा मोठमोठ्या साथीचे आजार आले, तेव्हा नर्सेस आणि डॉक्टरांनी ती बाजू चांगली धरून ठेवली. आणि आम्ही फ्लोरेन्स नाइटिंगेलचा आदर्श मानणार आणि तुम्ही... मी त्याचाही तुम्हाला २८ तारखेला PC देणार आहे. या सगळ्याची माहिती घेऊन तुम्हाला देणार. कारण या महाराष्ट्रात, या मुंबईत परिचारिकांना संपवायचंच आहे, ती पदंच ठेवायची नाहीत, असा काहीतरी डाव होतोय आणि प्रायव्हेट सेक्टरला खूप मोठ्या प्रमाणात सपोर्ट करायचाय, असा डाव दिसतोय. माझ्या हातात सगळे पुरावे येऊ दे, मी ते मांडेन, असं म्हणत किशोरी पेडणेकरांनी संताप व्यक्त केला आहे.