गणेशोत्सवात पुण्याच्या मध्यवर्ती भागात जड वाहनांना 'नो एंट्री'; १२ सप्टेंबरपासून २४ तास बंदी

पुणे: गणेशोत्सवाच्या पार्श्वभूमीवर पुणे शहरात मोठ्या प्रमाणावर भाविकांची गर्दी होणार असल्याने मध्यवर्ती भागात होणारी मोठी वाहतूक कोंडी टाळण्यासाठी पुणे शहर वाहतूक पोलिसांनी महत्त्वाचा निर्णय घेतला आहे. गणेशोत्सवादरम्यान शहराच्या मध्यवर्ती भागातील प्रमुख मार्गांवर जड व अवजड वाहनांच्या वाहतुकीवर पूर्णपणे निर्बंध घालण्यात आले आहेत. पुणे शहर वाहतूक शाखेने मध्यवर्ती भागातील मुख्य मार्गांवर दि. १२ सप्टेंबरपासून पुढील २४ तास जड-अवजड वाहनांना वाहतूकबंदी (नो एंट्री) लागू केली आहे. गणेशोत्सवाचा हा काळ विसर्जनापर्यंत म्हणजेच २६ सप्टेंबरपर्यंत चालणार असून, या संपूर्ण कालावधीत नागरिकांची सुरक्षितता आणि वाहतूक सुरळीत ठेवण्यासाठी हे कडक निर्बंध लागू राहतील.

गणेशोत्सवात मध्यवर्ती भागातील प्रमुख गणपती मंडळे, विसर्जन मिरवणुका आणि दर्शन घेण्यासाठी येणाऱ्या भाविकांची प्रचंड गर्दी होत असते. या काळात जड वाहनांमुळे रस्त्यांवर मोठी वाहतूक कोंडी होऊ नये आणि कोणताही अनुचित प्रकार किंवा अपघात टाळता यावा, यासाठी हा निर्णय घेण्यात आला आहे. या वाहतूक बंदीमध्ये टिळक रोड, नाना पेठ, रस्ता पेठ, कुमठेकर रोड, लक्ष्मी रोड, फडके हौद चौक परिसर, बाजीराव रोड, शिवाजी रोड, कर्वे रोड, फर्ग्युसन कॉलेज रोड, जंगली महाराज रोड आणि इतर परिसरातील मध्यवर्ती मार्गांचा समावेश आहे.

तसेच गणेशोत्सवाच्या या १० दिवसांच्या काळात गर्दीच्या ठिकाणी वाहतुकीवर काटेकोर नियंत्रण ठेवण्यासाठी आवश्यकतेनुसार आणि परिस्थितीनुसार स्थानिक पोलिसांकडून वाहतूक मार्गांमध्ये तात्पुरते बदल करण्यात येणार आहेत. वाहनचालक आणि नागरिकांनी होणारा त्रास टाळण्यासाठी पर्यायी मार्गांचा वापर करावा आणि प्रशासनाला व वाहतूक पोलिसांच्या सूचनांचे तंतोतंत पालन करावे, असे आवाहन पुणे शहर वाहतूक विभागाकडून करण्यात आले आहे.