नाशिक: महिन्याभरापूर्वीच डोक्यावरचं आईचं छत्र हरपलं, अन् आता भरधाव ट्रकच्या धडकेत २४ वर्षीय तरुण जागीच ठार

नाशिक: अवघ्या महिन्याभरापूर्वीच डोक्यावरचं आईचं छत्र हरपलं होतं, त्या दुःखातून सावरत 24 वर्षांचा तरुण कसंतरी जगण्याची उमेद धरत होता. लोकशाहीर अण्णा भाऊ साठे यांच्या जयंतीच्या मिरवणुकीत उत्साहाने सहभागी झाला होता. पण, नियतीच्या मनात काही वेगळंच होतं. या तरुणावरही काळानं झडप घातली आणि क्षणात सगळं संपलं.मिरवणुकीचा आनंद काही क्षणांत किंकाळ्यांमध्ये बदलला आणि २४ वर्षांच्या तरुणीने जागीच जीव सोडला.

मिरवणुकीतील धावपळ अन् अचानक आलेला काळ
शनिवारी सायंकाळी नांदगावात लोकशाहीर अण्णा भाऊ साठे यांच्या जयंतीनिमित्त अत्यंत उत्साहात मिरवणूक काढण्यात आली होती. गांधीनगर येथील सुनील साठे हा 24 वर्षीय तरुणही या मिरवणुकीत मोठ्या उत्साहाने सहभागी झाला होता. मिरवणूक नगरपरिषदेच्या जलकुंभाजवळील येवला रस्त्यावरून जात असताना, तिथे असलेल्या स्पीड ब्रेकरवरुन येवल्याच्या दिशेने जाणारा हरियाणा पासिंगचा एक ट्रक जात होता. याच वेळी अचानक सुनील गतिरोधकाजवळ चालत्या ट्रकच्या चाकाखाली सापडला.

काही समजायच्या आत सुनीलचा ट्रकखाली चिरडून मृत्यू झाला. हा भयानक प्रकार पाहताच मिरवणुकीत गोंधळ उडाला, परिसरात शोककळा पसरली आहे. कुटुंब एका दुःखातून सावरत नव्हतं तोच आता मुलगाही गमावल्याने कुटुंबियांनी टाहो फोडला आहे.

महिनाभरापूर्वीच आईचे निधन
सुनीलच्या अपघाती निधनाची बातमी वाऱ्यासारखी पसरताच परिसरात हळहळ व्यक्त केली जात आहे. सर्वात भीषण आणि मन हेलावून टाकणारी गोष्ट म्हणजे, अवघ्या महिनाभरापूर्वीच सुनीलच्या आईचे निधन झाले होते. आईच्या जाण्याचे दुःख कुटुंब पचवत असतानाच, आता घराबाहेर पडलेला २४ वर्षांचा जवान मुलगा थेट तिरडीवरूनच परत आल्याने साठे कुटुंबावर दुःखाचा डोंगर कोसळला आहे.