बीड: केजजवळ ओव्हरटेकचा थरार अन् ट्रॅक्टरसह दोन कारचा भीषण तिहेरी अपघात; दोघे गंभीर जखमी,९ ऊस मजुरांचे टळले मोठे प्राणसंकट

बीड: ऊसतोडणीच्या हंगामासाठी पश्चिम महाराष्ट्रात निघालेल्या मजुरांच्या ट्रॅक्टरला ओव्हरटेक करण्याच्या नादात मध्यरात्री भीषण दुर्घटना घडली. केज तालुक्यातील साळेगाव शिवारात मंगळवारी मध्यरात्री ट्रॅक्टरसह दोन कारची समोरासमोर जोरदार धडक होऊन झालेल्या तिहेरी अपघातात दोन तरुण गंभीर जखमी झाले. वाहनांचा वेग एवढा प्रचंड होता की तिन्ही वाहनांचा अक्षरशः चक्काचूर झाला आहे. जखमींना केज उपजिल्हा रुग्णालयात प्राथमिक उपचार दिल्यानंतर प्रकृती चिंताजनक असल्याने पुढील उपचारांसाठी अंबाजोगाई येथील स्वाराती रुग्णालयात तातडीने हलवण्यात आले आहे.

मागोमाग आलेल्या पांढऱ्या कारची धडक; मोठा अनर्थ टळला
काळी कार ट्रॅक्टरला धडकून रस्त्याच्या मधोमध आडवी पडलेली असतानाच, अवघ्या काही सेकंदांत कळंबकडून केजच्या दिशेने भरधाव वेगात येणाऱ्या पांढऱ्या रंगाच्या कारने (क्रमांक: MH 44 Z 5684) रस्त्यावरील आडव्या पडलेल्या कारला आणि ट्रॅक्टरला पुन्हा जोराची धडक दिली. एकापाठोपाठ झालेल्या या भीषण तिहेरी धडकेने महामार्गावर प्रचंड मोठा आवाज झाला. सुदैवाने ट्रॅक्टरमधील नऊ ऊसतोड मजूर या भीषण अपघातातून थोडक्यात बचावले, अन्यथा मोठा अनर्थ ओढवला असता.

केज पोलिसांची तत्परता; जखमींना तातडीने रुग्णालयात हलवले
या अपघातात अशोक विठ्ठल शिंदे (वय २१, रा. कळंब) आणि ट्रॅक्टरचालक तरुण अभिषेक राजेंद्र शेळके (वय २०, रा. पहाडी हिवरा, ता. बीड) हे दोघे गंभीर जखमी झाले असून त्यांच्यावर अंबाजोगाई येथे अतिदक्षता विभागात उपचार सुरू आहेत. अपघाताची माहिती मिळताच केज पोलीस ठाण्याचे पोलीस निरीक्षक राहुल सूर्यतळ यांच्या सूचनेनुसार सहाय्यक पोलीस उपनिरीक्षक पी. टी. (प्रल्हाद) चव्हाण आणि चालक शिंदे यांनी तात्काळ रुग्णवाहिकेसह घटनास्थळी धाव घेतली. पोलिसांनी स्थानिक नागरिकांच्या सहकार्याने तिन्ही अपघातग्रस्त वाहने रस्त्याच्या बाजूला काढून महामार्गावरील खोळंबलेली वाहतूक तात्काळ खुली केली. या प्रकरणी नोंद घेण्याचे काम सुरू असल्याचे पोलीस निरीक्षक राहुल सूर्यतळ यांनी सांगितले.