मुंबई: कूपर रुग्णालयाच्या शौचालयात नवजात अर्भकाचा मृतदेह; सीसीटीव्हीच्या आधारे तपास सुरू

मुंबई: विलेपार्ले परिसरातील महापालिकेच्या कूपर रुग्णालयात अत्यंत धक्कादायक घटना उघडकीस आली आहे. रुग्णालयाच्या ओपीडीजवळील शौचालयात एका नवजात अर्भकाचा मृतदेह आढळून आल्याने परिसरात एकच खळबळ उडाली आहे. ही घटना समोर आल्यानंतर रुग्णालय प्रशासन आणि पोलिसांनी तातडीने तपास सुरू केला आहे.

मिळालेल्या माहितीनुसार, एका महिलेने शौचालयात प्रवेश केल्यानंतर कमोडमध्ये नवजात अर्भकाचा हात दिसल्याने तिने तात्काळ आरडाओरडा केला. त्यानंतर रुग्णालयातील सुरक्षा कर्मचारी आणि वैद्यकीय पथक घटनास्थळी पोहोचले. पोलिसांनी मृतदेह ताब्यात घेऊन शवविच्छेदनासाठी पाठवला आहे.

या प्रकरणाचा तपास करण्यासाठी जुहू पोलिसांनी रुग्णालयातील आणि परिसरातील सीसीटीव्ही फुटेज ताब्यात घेतले असून संशयास्पद हालचालींची छाननी सुरू आहे. तसेच रुग्णालयातील कर्मचारी, ओपीडी परिसरातील उपस्थित व्यक्ती आणि अलीकडील हालचालींची चौकशी केली जात आहे. अर्भकाची ओळख, मृत्यूचे कारण आणि मृतदेह शौचालयात कोणी ठेवला याचा शोध घेण्यासाठी सर्व बाजूंनी तपास सुरू आहे.