पुणे: पुण्यात खोटा आयएएस अधिकारी असल्याचा बनाव; २१ वर्षीय तरुणाने उच्चभ्रू सोसायटीला गंडवले ३५ लाख

पुणे: पुण्यातील बाणेर परिसरात एका २१ वर्षीय तरुणाने आपण यूपीएससी परीक्षा उत्तीर्ण होऊन आयएएस (IAS) अधिकारी झाल्याचे भासवून उच्चभ्रू सोसायटीतील नागरिकांची तब्बल ३५ लाख रुपयांची फसवणूक केल्याची धक्कादायक घटना उघडकीस आली आहे. याप्रकरणी बाणेर पोलिसांनी हितेश प्रमोद कुलकर्णी (वय २१, रा. फ्लॅट नंबर ६०४, डी विंग, ५१ बी इनक्लुजीव्ह को-ऑपरेटिव्ह सोसायटी, बालेवाडी हायस्ट्रीट जवळ) या तरुणाला बेड्या ठोकल्या आहेत. या प्रकरणी दत्तात्रय वैजनाथ नागरगोजे (वय ३१) यांनी बाणेर पोलीस ठाण्यात अधिकृत फिर्याद दाखल केली आहे.

पोलिसांनी दिलेल्या सविस्तर माहितीनुसार, आरोपी हितेश कुलकर्णी याने आपण केंद्र शासनात आयएएस अधिकारी असल्याची खोटी बतावणी करून परिसरातील आणि सोसायटीतील नागरिकांचा पूर्ण विश्वास संपादन केला. याचाच गैरफायदा घेत त्याने सोसायटीतील विक्री न झालेल्या फ्लॅटची 'लॉटरी' पद्धतीने स्वस्त किंवा सुलभ किमतीत विक्री करून देण्याचे मोठे आमिष नागरिकांना दाखवले. या आमिषाला बळी पडून अनेक नागरिकांनी त्याच्याकडे पैशांची देवाणघेवाण केली. इतकेच नव्हे तर, सोसायटीचा चेअरमन पदावर असताना त्याने आपल्या पदाचा गैरवापर केला.

या फसवणुकीच्या प्रकारात आरोपीने सोसायटीच्या सभासद पूजा जाधव आणि फिर्याददार दत्तात्रय नागरगोजे यांच्या खोट्या व बनावट सह्या केल्या. या बनावट सह्यांद्वारे तयार केलेली ना-देय (No Dues) प्रमाणपत्रे आणि कागदपत्रे बँकेत सादर केली. या कागदपत्रांच्या आधारे त्याने सोसायटीच्या बँक खात्याची ऑनलाइन बँकिंग सुविधा अनधिकृतपणे सुरू करून घेतली.

आरोपी एवढ्यावरच थांबला नाही, तर त्याने सोसायटीच्या बँक खात्यातील सुमारे ३७ लाख रुपयांच्या मुदत ठेवीवर (FD) परस्पर १० लाख रुपयांचे कर्ज काढले. तसेच सोसायटीची एफडी मोडत खात्यातील लाखो रुपये स्वतःच्या वैयक्तिक बँक खात्यावर ऑनलाइन पद्धतीने वळवून घेतले. या संपूर्ण कारस्थानामुळे उच्चभ्रू सोसायटीतील सभासदांची एकूण ३५ लाख रुपयांची आर्थिक फसवणूक झाल्याचे समोर आले आहे. या गंभीर गुन्ह्याची नोंद घेत बाणेर पोलिसांनी आरोपी हितेश कुलकर्णी याला तात्काळ अटक केली असून, या प्रकरणाचा पुढील सखोल तपास पोलिसांकडून सुरू आहे.



गुन्हा

राजकीय

विडियो गॅलेरी

देश विदेश

Leave a Reply

Your email address will not be published. Required fields are marked *