सांगली एसटी आगारात संतापजनक प्रकार: महिला कर्मचाऱ्याकडे शरीरसुखाची मागणी करणाऱ्या लिपिकाला वर्धापन दिनाच्या कार्यक्रमातच चोपले

सांगली: एसटीच्या विभागीय कार्यालयात एका वरिष्ठ लिपिकाला भर कार्यक्रमात बेदम चोप दिल्याचा धक्कादायक प्रकार समोर आला आहे. एसटी महामंडळाच्या वर्धापन दिनाच्या कार्यक्रमात हा प्रकार घडल्याने एकच खळबळ उडाली आहे. या वरिष्ठ लिपिकाने एका महिला कर्मचाऱ्याकडे शरीरसुखाची मागणी केल्याचा आरोप करण्यात आला आहे, ज्यानंतर संतप्त नातेवाईक आणि काही कर्मचाऱ्यांनी त्याला धडा शिकवला.

सांगली येथील एसटीच्या विभागीय कार्यालयात वर्धापन दिनाचा कार्यक्रम सुरू होता. यादरम्यान, एका वरिष्ठ लिपिकावर एका महिला कर्मचाऱ्याचा मानसिक आणि लैंगिक छळ केल्याचा आरोप झाला. संबंधित लिपिकाने वारंवार शरीरसुखाची मागणी करून पीडित महिलेला त्रास दिला होता. ही बाब समजताच पीडित महिलेच्या समर्थकांनी आणि काही संतप्त कर्मचाऱ्यांनी कार्यक्रमाच्या ठिकाणीच या लिपिकाला गाठले आणि त्याला मारहाण केली.

व्हिडिओ व्हायरल

या घटनेचा व्हिडिओ सोशल मीडियावर मोठ्या प्रमाणात व्हायरल झाला असून, त्यात आरोपी लिपिकाला काही लोक मारहाण करताना दिसत आहेत. एसटीच्या एका महत्त्वाच्या कार्यक्रमात अशा प्रकारचा वाद झाल्याने प्रशासनावरही प्रश्नचिन्ह निर्माण झाले आहे. या घटनेनंतर संबंधित लिपिकावर कठोर कारवाईची मागणी केली जात असून, पोलीस या प्रकरणाचा अधिक तपास करत आहेत. विभागातील अन्य महिला कर्मचाऱ्यांच्या सुरक्षेचा प्रश्नही या घटनेने ऐरणीवर आला आहे.