पुण्यात विद्यार्थ्यांच्या सुरक्षेशी खेळ! लोहगावातील ११ विनापरवाना व असुरक्षित 'पीजी हॉस्टेल' सील; महापालिकेची मोठी कारवाई

 

पुणे: पुण्यातील लोहगाव आणि निंबाळकर नगर परिसरात विद्यार्थ्यांच्या सुरक्षेशी खेळ करणाऱ्या आणि विनापरवाना चालवल्या जाणाऱ्या ११ पेइंग गेस्ट (पीजी) व हॉस्टेलवर पुणे महानगरपालिकेच्या अग्निशामक दलाने सील ठोकले आहे. या इमारतींमध्ये शेकडो विद्यार्थी राहत असूनही तेथे अग्निसुरक्षेची कोणतीही उपाययोजना नव्हती, तसेच पालिकेचे कोणतेही अधिकृत परवाने नसल्याचे तपासणीत उघड झाले आहे.

तपासणीत उघड झाली गंभीर बाब: महापालिका आयुक्तांच्या आदेशानुसार शहरात सुरू असलेल्या अग्निसुरक्षा तपासणी मोहिमेदरम्यान अग्निशामक दलाच्या पथकाने लोहगाव भागात पाहणी केली. तीन ते चार मजली इमारतींमध्ये १०० हून अधिक विद्यार्थी दाटीवाटीने राहत असल्याचे निष्पन्न झाले.

हॉस्टेल चालकांकडे खालीलपैकी कोणतेही अधिकृत दस्तऐवज उपलब्ध नव्हते:

• फायर एनओसी (Fire NOC)

• बिल्डिंग परवानगी (Building Permission)

• स्ट्रक्चरल ऑडिट रिपोर्ट (Structural Audit Report)

• ड्रेनेज व पाणी एनओसी (Drainage & Water NOC)

• प्रॉपर्टी टॅक्स रेकॉर्ड (Property Tax Records)

महापालिकेचा कडक कारवाईचा इशारा: या कारवाईदरम्यान अनेक विद्यार्थ्यांनी सांगितले की त्यांच्या महाविद्यालयांनीच त्यांना या खाजगी पीजी हॉस्टेलची शिफारस केली होती. यावर प्रशासनाने कडक भूमिका घेत स्पष्ट केले आहे की, विद्यार्थ्यांना अशा असुरक्षित व अनधिकृत हॉस्टेलमध्ये पाठवणाऱ्या शैक्षणिक संस्था व महाविद्यालयांवरही गुन्हे दाखल केले जातील.

गणेशोत्सवानंतर लोहगाव, खराडी आणि वाघोली परिसरातील बेकायदेशीर पीजी हॉस्टेलविरोधात ही मोहीम अधिक तीव्र केली जाणार असल्याचे अतिक्रमण विरोधी विभागाने स्पष्ट केले आहे.