मुरुम चोरी पकडल्याने तलाठ्याला दमदाटी व अंगावर धावून जाण्याचा प्रयत्न! दौंड तालुक्यातील देऊळगाव राजेत दोघांवर गुन्हा दाखल

दौंड/पुणे: दौंड तालुक्यातील देऊळगाव राजे येथे शासकीय रॉयल्टी न भरता बेकायदेशीरपणे मुरुमाची चोरी व वाहतूक करणाऱ्या हायवा ट्रकला महिला तलाठ्याने अडवून विचारणा केली असता, संशयितांनी रागाच्या भरात अंगावर धावून जात दमदाटी केली आणि शासकीय कामात अडथळा निर्माण केला. याप्रकरणी दोन जणांविरोधात दौंड पोलीस ठाण्यात गुन्हा दाखल करण्यात आला आहे.

नेमकी घटना काय? ग्राम महसूल अधिकारी (तलाठी) शुभांगी बबन गुंड (वय ३२) या देऊळगाव राजे ते वडगाव दरेकर रोडवर कार्यरत असताना त्यांना एका हायवा ट्रकमधून मुरुमाची वाहतूक केली जात असल्याचे निदर्शनास आले. शासकीय रॉयल्टी किंवा परवाना नसताना ही मुरुम वाहतूक सुरू असल्याचे स्पष्ट झाल्यानंतर त्यांनी वाहनाची चौकशी सुरू केली.

दमदाटी आणि शासकीय कामात अडथळा: मुरुम चोरी पकडली गेल्याचे लक्षात येताच संबंधित व्यक्तींनी महिला अधिकाऱ्याशी हुज्जत घालत हाताच्या बाह्या वर करून अंगावर धावून जाण्याचा प्रयत्न केला आणि शासकीय कामात अडथळा आणला.

दोघांवर विविध कलमांनुसार गुन्हा: या घटनेप्रकरणी तलाठी शुभांगी गुंड यांनी दिलेल्या फिर्यादीवरून अंबादास शेळके आणि नरेंद्र दादा कोरे (दोघे रा. देऊळगाव राजे, ता. दौंड) यांच्याविरुद्ध भारतीय न्याय संहिता (BNS) कलम ३०३(२), १३२, ३५१(१), ३५२, ३(५) आणि महाराष्ट्र गौण खनिज उत्खनन कायद्याच्या कलम ४ व २१ अन्वये गुन्हा नोंदवण्यात आला आहे. दौंड पोलीस या प्रकरणाचा पुढील तपास करत आहेत.