मुंबई: राज ठाकरेंनी आंदोलनात जाऊन रोहित पवारांचे कान टोचले; भाजपचा जोरदार हल्लाबोल

मुंबई: रोहित पवारांच्या नेतृत्वात सुरू असलेल्या एमपीएससी (MPSC) विद्यार्थ्यांच्या आंदोलनाचा आज सहावा दिवस आहे. या आंदोलनातून रोहित पवारांकडून सातत्याने कठोर शब्दात सरकारवर टीका केली जात आहे. आंदोलनाच्या पार्श्वभूमीवर आयोगाच्या अध्यक्ष आणि माजी अध्यक्षांवर कारवाई करण्यासाठी एक समिती गठीत करण्यात आली आहे. त्यानंतरही आंदोलकांकडून आयोगाचे अध्यक्ष विवेक भीमनवार यांच्या राजीनाम्याची मागणी ठामपणे केली जात आहे. दरम्यान, काल महाराष्ट्र नवनिर्माण सेनेचे अध्यक्ष राज ठाकरे यांनी आंदोलनस्थळी प्रत्यक्ष भेट देऊन विद्यार्थ्यांना संबोधित केले होते आणि ७० हजार नोकरभरतीवरून आपली रोखठोक भूमिका मांडली होती. या घडामोडींवरून आता भाजप नेते नवनाथ बन यांनी आमदार रोहित पवार यांच्यावर अतिशय आक्रमक शब्दांत जोरदार हल्लाबोल केला आहे.

भाजप नेते नवनाथ बन यांनी प्रसारमाध्यमांशी बोलताना रोहित पवार यांच्यावर चौफेर टीका केली. ते म्हणाले, "एमपीएससी आयोगाच्या अध्यक्षांना पदावरून हटवायचे झाल्यास त्यांना राज्यपाल किंवा राष्ट्रपतींकडे राजीनामा द्यावा लागतो. रोहित पवारांनी आधी संविधानाचा अभ्यास करावा. रोहित पवारांचे काम फक्त अफवा पसरवण्याचे असून त्यांचे स्वतःचे असे कोणतेही कर्तृत्व नाही. ते केवळ आजोबा मुख्यमंत्री होते म्हणून आमदार झाले आहेत, जर ते नसते तर रोहित पवारांना ग्रामपंचायतचे सदस्यही कोणी केले नसते. रोहित पवार हे आपल्या राजकीय अहंकारासाठी विद्यार्थ्यांच्या खांद्यावर बंदूक ठेवून आंदोलन पेटवत आहेत आणि खोटे बोलण्याचे काम करत आहेत."

आगे बोलताना नवनाथ बन यांनी दावा केला की, "काल राज ठाकरेंनी रोहित पवारांच्या आंदोलनात जाऊन त्यांचे बिंग फोडले आहे. राज ठाकरेंनी अत्यंत स्पष्ट शब्दांत सांगितले की, आयोगाच्या अध्यक्षांना सहजासहजी हटवता येत नाही कारण त्यासाठी १९५० चा कायदा आहे आणि त्या कायद्यानुसार त्यांना संरक्षण मिळते. राज ठाकरेंनी सर्वांसमोर हे उघड केल्याबद्दल मी त्यांचे आभार मानतो. आंदोलनात विद्यार्थ्यांचा हवा तसा प्रतिसाद मिळत नसल्यामुळेच आता रोहित पवारांना बारामती ॲग्रोचे कार्यकर्ते आणि बाहेरून माणसे आयात करावी लागली आहेत."

रोहित पवारांच्या टीकेला प्रत्युत्तर देताना नवनाथ बन म्हणाले की, "रोहित पवार माझ्यावर विविध प्रकारच्या वैयक्तिक टीका करतात आणि मी भूंकतो असे म्हणतात, परंतु त्यांची स्वतःची कोल्हेकुई संपूर्ण महाराष्ट्राने पाहिली आहे. त्यांनी उद्योगपतींच्या चरणी आपला स्वाभिमान गहाण ठेवला आहे. बारामतीत जेव्हा अदानी आले होते, तेव्हा त्यांचे वाहन चालवताना ते स्वतः ड्रायव्हर बनले होते, हे महाराष्ट्राने पाहिले आहे. ते मला सोशल मीडियावरील कमेंट्स वाचण्यास सांगतात, पण त्यांनी स्वतः मला ट्रोल करण्यासाठी २ कोटी रुपयांचे बजेट ठेवून ट्रोलधाड लावली आहे. मात्र, मी असल्या ट्रोलिंगला कधीही घाबरत नाही. मी भाजपचा कार्यकर्ता असून त्याआधी अखिल भारतीय विद्यार्थी परिषदेत (ABVP) बीडमध्ये काम केले आहे. आजोबांच्या जीवावर आमदार झालेल्यांनी आमच्यावर किंवा पक्षावर टीका करू नये," असा पलटवार नवनाथ बन यांनी केला.