Railways Issues Helpline Numbers

Odisha Railway Accident: ओडिशाच्या बालासोरमध्ये शुक्रवारी रात्रीच्या सुमारास मोठा रेल्वे अपघात झाला. हा देशातील सर्वात मोठा रेल्वे अपघात आहे. या भीषण रेल्वे अपघातामध्ये आतापर्यंत 233 प्रवाशांचा मृत्यू झाला आहे. तर 900 हून अधिक जण जखमी आहेत. या रेल्वे अपघाताच्या चौकशीचे आदेश देण्यात आले आहेत. घटनास्थळावर लष्कर आणि वायूदलाचे जवान मदतकार्य करत आहे. या अपघातामध्ये मृत्यू आणि जखमी झालेल्या प्रवाशांची संख्या मोठी आहे. अशामध्ये रेल्वे प्रशासनाने हेल्पलाइन नंबर जारी केले आहेत.

कोरोमंडल एक्स्प्रेसने मालगाडीला जोरदार धडक दिली. ही एक्स्प्रेस चेन्नली जात होती. या अपघातादरम्यान या एक्स्प्रेसचे इंजिन मालगाडीवर चढले. त्यानंतर या एक्स्प्रेसच्या पाठीमागचे डबे रुळावरुन घसरुन दुसऱ्या रुळावर पडले. त्याचवेळी या रुळावरुन हावडा-बंगळुरु एक्स्प्रेस येत होती. या एक्स्प्रेसने कोरोमंडल एक्स्प्रेसच्या डब्याला धडक दिली. त्यानंतर या एक्स्प्रेसचे डबे देखील रुळावरुन घसरले. या भीषण अपघातामध्ये तीन्ही ट्रेनचे मोठे नुकसान झाले आहे. या अपघातामध्ये मोठ्याप्रमाणात जीवितहानी झाली आहे.

ओडिशामध्ये ज्या ट्रेनचा अपघात झाला आहे. त्या ट्रेनमधून ज्यांनी प्रवास केला त्यांचे नातेवाईक आणि कुटुंबीय चिंतेत आले आहेत. त्यांच्या आपल्या माणसांबाबत काहीच माहिती मिळत नाही आहे. अशामध्ये जर तुमचे नातेवाईक किंवा परिवारातील सदस्य ट्रेन अपघातामध्ये अडकले असतील तर तुमच्यासाठी रेल्वेकडून हेल्पलाइन नंबर जारी करण्यात आले आहेत. या हेल्पलाइन नंबरवर कॉल करुन तुम्ही तुमच्या नातेवाईकांबद्दल चौकशी करुन माहिती जाणून घेऊ शकतात. या अपघातात जे जखमी झाले आहेत त्यांची सध्या परिस्थिती काय आहे याबद्दल देखील तुम्ही चौकशी करु शकतात.