Pune : दिवाळीनंतर परतीच्या प्रवासाला लागल्यामुळे महामार्गांवर वाहतूक कोंडी

Pune : दिवाळीच्या सुट्ट्या संपल्यानंतर पुणे आणि मुंबईतील नोकरदार वर्ग तसेच नागरिक मोठ्या संख्येने आपापल्या शहरांकडे परत येत असल्याने पुणे आणि परिसरातील प्रमुख महामार्गांवर भयंकर वाहतूक कोंडी झाली आहे. वाहतूक पोलिसांनी नागरिकांना प्रवास जपून करण्याचे आणि सार्वजनिक वाहतूक व्यवस्थेचा वापर करण्याचे आवाहन केले आहे.

पुणे ग्रामीण पोलीस, पुणे शहर वाहतूक विभाग आणि पिंपरी-चिंचवड वाहतूक विभागाने संयुक्तपणे दिलेल्या माहितीनुसार, खालील महामार्गांवर आज (रविवार, २६ ऑक्टोबर) आणि उद्या (सोमवार, २७ ऑक्टोबर) गर्दी कायम राहण्याची शक्यता आहे.

PM Narendra Modi : धक्कादायक खुलासा! अमेरिकी सैन्य अधिकारी पंतप्रधान मोदींच्या हत्येच्या कटात; कोणी वाचवला जीव?

मुंबई-पुणे एक्सप्रेसवे (Mumbai-Pune Expressway) आणि जुना पुणे-मुंबई महामार्ग: मुंबई आणि आसपासच्या भागातून पुण्यात परतणाऱ्या वाहनांमुळे या मार्गांवर मोठी कोंडी झाली आहे.

पुणे-बंगळूर राष्ट्रीय महामार्ग (NH-48): कोल्हापूर, सातारा आणि कराडकडून पुणे, मुंबई, नवी मुंबई, ठाणे आणि मीरा-भाईंदरकडे जाणाऱ्या वाहनांची संख्या वाढल्याने या मार्गावर वाहतूक संथ झाली आहे.

पुणे-नाशिक राष्ट्रीय महामार्ग (NH-50): नाशिक आणि आसपासच्या भागातून चाकणमार्गे पुण्यात येणाऱ्या वाहनांमुळे या मार्गावर गर्दी अपेक्षित आहे

 पुणे-सोलापूर राष्ट्रीय महामार्ग (NH-65): सोलापूरहून पुण्याच्या दिशेने येणाऱ्या वाहनांची संख्या वाढल्याने येथेही कोंडीची शक्यता आहे.

वाहतूक कोंडी टाळण्यासाठी नागरिकांनी सकाळचे ७ ते ११ आणि सायंकाळचे ५ ते रात्री ९ या वेळेत प्रवास करणे टाळावे.

पोलिसांचे आवाहन आणि सूचना:
अनावश्यक प्रवास टाळा: अत्यंत महत्त्वाचे काम असल्याशिवाय घराबाहेर पडू नका.
पर्यायी मार्गांचा वापर: शक्य असल्यास महामार्गांना समांतर असलेले किंवा कमी वर्दळीचे पर्यायी मार्ग निवडा.
सार्वजनिक वाहतूक: खासगी वाहनांऐवजी सार्वजनिक वाहतूक (एस.टी. बस, रेल्वे) वापरा.
शिस्त पाळा: महामार्गावर लेनची शिस्त पाळा आणि नियम तोडून ओव्हरटेकिंग करणे टाळा.
प्रवासाचे नियोजन: प्रवासाला निघण्यापूर्वी वाहतूक स्थिती पाहून वेळेचे योग्य नियोजन करा.*पोलिसांना सहकार्य: वाहतूक नियमन करणाऱ्या पोलीस कर्मचाऱ्यांना सहकार्य करा.