Pune : पुणे पोर्शे कार अपघात प्रकरणात मोठी अपडेट; न्यायालयाने सर्व नऊ आरोपींबाबत महत्त्वाचा निर्णय दिला, नेमकं काय घडलं?

Pune : पुण्यातील कल्याणीनगर 'पोर्श हिट अँड रन' या गंभीर प्रकरणातील नऊ आरोपींचे जामीन अर्ज मुंबई उच्च न्यायालयाने मंगळवारी फेटाळून लावले. त्यामुळे या आरोपींना जवळपास दीड वर्षानंतरही जामीन दिलासा मिळू शकलेला नाही.

गेल्या वर्षी १९ मे रोजीच्या पहाटे अल्पवयीन मुलाने मद्याच्या नशेत अत्यंत बेदरकारपणे भरधाव कार चालवल्याने अनीश अवधिया व अश्विनी कोष्ठ या दोघांचा मृत्यू झाला. तरीही बालन्यायमंडळाने मुख्य अल्पवयीन आरोपीला केवळ निबंध लेखनासह अन्य अटींवर जामीन मंजूर केल्याने हे प्रकरण अधिक चर्चेत आले होते. त्या कारमध्ये मुख्य आरोपी अल्पवयीन मुलाचा अल्पवयीन मित्र मागील आसनावर बसला होता. या दोन्ही मुलांच्या पालकांनी त्यांना गुन्ह्याच्या प्रकरणातून वाचवण्यासाठी पुण्यातील ससून रुग्णालयातील डॉक्टरांना लाच देऊन त्यांच्या रक्ताचे नमुने बदलले होते. त्यामुळे या प्रकरणाचे गांभीर्य अधिक वाढले.

Expressway : पुणे ते जळगाव अवघ्या ३ तासांत! नव्या एक्सप्रेसवेचा संपूर्ण आराखडा काय? जाणून घ्या

'मुख्य आरोपीने मद्याच्या नशेत बेधुंद होऊन कार चालवल्याने दोन निष्पाप युवांना हकनाक आपले प्राण गमवावे लागले. इतकेच नव्हे तर दोन्ही अल्पवयीन आरोपी मुलांना वाचवण्यासाठी त्यांच्या पालकांनी त्यांच्या रक्ताचे नमुने बदलले. शिवाय त्या गुन्हेगारी कटात रुग्णालयातील डॉक्टर व मध्यस्थांनीही सहभाग घेतला. असे हे अत्यंत गंभीर गुन्हेगारी प्रकरण आहे. आरोपींना जामीन मंजूर केल्यास ते साक्षीदारांवर सहजपणे प्रभाव टाकू शकतात किंवा दबाव टाकू शकतात. त्यामुळे आरोपींचा जामीन मंजूर करू नये, असा जोरकस युक्तिवाद विशेष सरकारी वकील शिशिर हिरे यांनी न्या. श्याम चांडक यांच्यासमोर मांडला.

न्यायमूर्तींनीही आरोपी साक्षीदारांवर प्रभाव टाकू शकतात आणि गुन्ह्याचे प्रकरण गंभीर आहे, हे लक्षात घेतले आणि त्यांचे अर्ज फेटाळून लावले. न्यायालयाच्या सविस्तर निर्णयाची प्रत नंतर उपलब्ध होणार आहे. या प्रकरणी मुख्य आरोपी मुलाचे वडील विशाल अगरवाल, दुसऱ्या आरोपी मुलाचे वडील अरुणकुमार सिंग, आशिष मित्तल, आदित्य सूद, अश्पाक मकंदर, डॉ. अजय टावरे श्रीहरी हळनोर, रुग्णालयातील कर्मचारी अजित घाटकांबळे व अन्य एक आरोपी न्यायालयीन कोठडीत आहेत. टावरे हा रुग्णालयातील फॉरेन्सिक मेडिसीन विभागाचा प्रमुख, तर हळनोर हा मुख्य वैद्यकीय अधिकारी आहे. मकंदर हा मध्यस्थ आहे. आरोपींच्या रक्ताचे नमुने बदलण्यासाठी अगरवालची ओळख डॉ. टावरे व हळनोरशी करून दिली आणि त्यानंतर मित्तल व सूद यांनी दोन्ही अल्पवयीन आरोपी मुलांच्या रक्तांच्या ऐवजी आपल्या रक्ताचे नमुने दिले, असा आरोप आहे.