Pune : पुण्यात शरद पवारांच्या आमदाराचं ‘सर्वपक्षीय’ प्रेम चर्चेत! मुलगा-सुनेनंतर आता मुलीही वेगवेगळ्या पक्षांतून ZP च्या रिंगणात

Pune : 2019 च्या विधानसभा निवडणुकीच्या निकालानंतर महाराष्ट्राच्या राजकराणात पक्षानिष्ठा, विचारधारा, तत्व आणि घटनात्मक मूल्य कशाबरोबर खातात याचाच विसर राज्यातील सर्वच पक्षांना अन् पक्षातील बड्या समजल्या जाणाऱ्या नेत्यांना पडलाय, असंच म्हणावं लागेल. कारण विकासाच्या गोंडस नावाखाली कोणता पक्ष कधी कोणासोबत युती - आघाडी करेल याचा काही नेम राहिला नाही. बरं पक्षच नाही तर विचारधारेच्या गप्पा मारनारे नेते सुद्धा सत्तेचं पद आपल्याच घरात हवं यासाठी कधी कोणत्या पक्षात उडी मारतील किंवा आपल्या घरातील व्यक्ती हे व्यक्ती स्वातंत्र्याच्या नावाखाली दुसऱ्या पक्षात पाठवतील याचा तर विचार सुद्धा करवत नाही.

काही वर्षांपूर्वी कोल्हपुरातील महाडिक घराणं असच सत्तेची सगळे पद आपल्याच घरात असावे यासाठी प्रसिद्ध होतं. महादेवराव महाडिक हे काँग्रेसचे विधानपरिषद आमदार होते. त्याचवेळी त्यांचे पुत्र हे राष्ट्रवादीचे खासदार झाले तर पुढच्या सहा महिन्यातच त्यांचे दुसरे पुत्र अमल महाडिक भाजपचे आमदार झाले. इतकंच नाही तर महापालिकेत महाडिक कुटुंबाची ताराराणी आघाडी झाली, म्हणजे दिल्लीपासून गल्लीपर्यंत सत्ता ही आपल्याच घरात हे सूत्र महाडिक कुटुंबाने अवलंबलं होतं. आता याचा पुढचा अंक पुण्यातील पठारे कुटुंबात पाहायला मिळत आहे.

Mumbai–Thane : मुंबई-ठाणेकरांचा प्रवास आता सुपरफास्ट! ७५ मिनिटांचा प्रवास फक्त २५ मिनिटांत; जाणून घ्या नवा मास्टर प्लॅन

2024च्या लोकसभा निवडणुकीवेळी शरद पवारांच्या राष्ट्रवादीचे विद्यमान आमदार बापूसाहेब पाठरे यांच्यासह संपूर्ण कुटुंब हे भाजपमध्ये होते. पठारे यांनी भाजपचे पुणे लोकसभा मतदारसंघाचे उमेदवार मुरलीधर मोहोळ यांचे काम केले. पुढे मोहोळ निवडून आले आणि केंद्रात मंत्री झाले. पण राज्यात महायुतीची अवस्था कहीं ख़ुशी कहीं गम अशी राहिली. त्याच वर्षी होत असलेल्या विधानसभा निवडणुकीत वारे पाहून पठारे यांनी थेट भाजपचे कमळ सोडत शरद पवारांची तुतारी हाती घेतली आणि वडगावशेरी विधानसभा मतदारसंघातून उमेदवारी मिळवत थेट अजित पवारांच्या राष्ट्रवादीचे सुनील टिंगरे यांचा पराभव केला.

मात्र, महाविकास आघाडीची अवस्था राज्यात बिकट झाली. त्यामुळे पठारे यांनी पुन्हा आपल्या जुन्या नेत्यांशी घरोबा करायला सुरुवात केली. ते कधी अजित पवारांच्या मांचवार दिसत तर कधी भाजपच्या नेत्यांसोबत एखाद्या कार्यक्रमात सहभागी होत. पुढे महापालिका निवडणूक येताच पठारे कुटुंबानी निर्णय घेतला आणि बापूसाहेब पठारे वगळता त्यांचा मुलगा सुरेंद्र पठारे, सून ऐश्वर्या पठारे आणि काही समर्थकांनी भाजपमध्ये प्रवेश केला. मनपा निवडणुकीत सुरेंद्र आणि ऐश्वर्या पठारे भरघोस मतांनी विजयी देखील झाले. शरद पवारांचे आमदार असलेले पठारे महापालिका निवडणुकीत ना राष्ट्रवादीच्या प्रचारात दिसले ना महत्त्वाच्या बैठकींना उपस्थित राहिले.

पठारेंचे सोयीस्कर राजकारण इथेच थांबले नाही. तर आता जिल्हा परिषद निवडणुकीत बापूसाहेब पाठरे यांच्या दोन्ही मुली वेगवेगळ्या पक्षातून रिंगणात उतरल्या आहेत. बापूसाहेब पठारे यांची एक मुलगी पूनम अमोल झेंडे या दिवे गराडे गटातून अजित पवारांच्या राष्ट्रवादीच्या उमेदवार आहेत तर दुसरी मुलगी दीपाली राहुल गव्हाणे या भाजपकडून तळेगाव ढमढेरे रांजणगाव सांडस जिल्हा परिषद गटातून भाजपच्या उमेदवार आहेत. त्यामुळे बापूसाहेब पठारे शरद पवारांच्या राष्ट्रवादीचे आमदार, मुलगा आणि सून भाजपचे नगरसेवक, एक मुलगी भाजपची झेडपी उमेदवार तर दुसरी मुलगी अजित पवारांच्या राष्ट्रवादीची झेडपी उमेदवार असं सर्वपक्षीय सत्ताकेंद्र आपल्याच घरात ठेवण्याचा प्रयत्न पठारे यांनी केला आहे. पुण्यात बापूसाहेब पठारे आप्पा म्हणून प्रसिद्ध आहेत. त्यामुळे आता पुणेकरांवर नाईलाजाने का होईना पण ‘आप्पाचा विषय लई हार्ड हे’ असंच म्हणण्याची वेळ आलीय, हे मात्र नक्की.