Pune : पुणेकरांना मोठा दिलासा! अभय योजनेत थकबाकीदारांना दंडात तब्बल 75% सूट; अंतिम तारीख काय आहे?

Pune : पुणे महापालिका हद्दीतील मिळकराची थकबाकी असलेल्या सुमारे पाच लाख मिळकतधारकांसाठी दंडाच्या रकमेत ७५ टक्के सूट देणारी अभय योजना १५ नोव्हेंबर ते १५ जानेवारी या दरम्यान राबविण्याचा निर्णय महापालिकेने घेतला आहे. महापालिकेने राबविलेल्या यापूर्वीच्या चार अभय योजनांमध्ये लाभ घेतलेल्या एक लाख ४० हजार थकबाकीदारांना या योजनेचा लाभ घेता येणार नसल्याचे महापालिका आयुक्त नवलकिशोर राम यांनी स्पष्ट केले. रस्त्यांच्या भूसंपादनासह मोठ्या प्रकल्पांसाठी निधीची आवश्यकता असल्याने या अभय योजनेचा निर्णय घेण्यात आला आहे.

पुणे महापालिका प्रशासनाने यापूर्वी २०१५-१६ पासून २०२१-२२पर्यंत वेगवेगळ्या चार अभय योजना राबविल्या होत्या. त्या अभय योजनांचा एक लाख ४० हजार थकबाकीदारांनी लाभ घेतला होता. या लाभधारकांकडे त्यानंतरही ४७७ कोटी रुपयांची थकबाकी आहे. त्यामुळे अभय योजनेचा लाभ घेतल्यानंतरही प्रामाणिकपणे मिळकतकर भरण्याकडे त्यांचा कल नसल्याने त्यांना येत्या अभय योजनेतून वगळण्यात आले आहे. त्याव्यतिरिक्त सुमारे पाच लाख मिळकतधारकांकडे १२ हजार १६१ कोटी रुपयांची थकबाकी आहे.

Bihar Election Result : सुरुवातीच्या कलांमध्ये एनडीएची आघाडी! बहुमताचा जादुई आकडा पार; कोणत्या पक्षाला किती आघाड्या?

सध्याच्या थकबाकीदारांकडे थकीत असलेल्या मिळकतकराच्या रकमेवर नऊ हजार दोन कोटी रुपयांचा दंड प्रलंबित आहे, तर त्यांची मिळकतकराची दंडाशिवाय प्रलंबित असलेली रक्कम तीन हजार १५८ कोटी रुपये आहे. दंडाच्या रकमेवर ७५ टक्के माफी देण्यात येणार असल्याने या थकबाकीदारांना सहा हजार ७०० कोटी रुपयांचा लाभ होणार आहे, तर सगळ्या थकबाकीदारांनी या योजनेचा लाभ घेतला, तर महापालिकेला किमान पाच हजार ४०० कोटी रुपये मिळू शकणार आहेत. या योजनेमधून मोबाइल टॉवरच्या थकबाकीदारांना वगळण्यातून आले आहे. त्यामुळे या योजनेमुळे महापालिकेला किमान एक हजार कोटी रुपये तरी मिळतील, असा अंदाज वर्तविण्यात येत आहे.

यापूर्वी थकबाकीचा लाभ घेतलेल्या एक लाख ४० हजार थकबाकीदारांची नावे या योजनेतून वगळण्यासाठी आवश्यक तांत्रिक बाबी पूर्ण करण्यास चार दिवसांचा कालावधी लागणार आहे. त्यामुळे या योजनेची सुरुवात १५ नोव्हेंबरपासून करण्यात येणार आहे.

थकबाकीदारांना महापालिकेच्या नागरी सुविधा केंद्र, बँक ऑफ महाराष्ट्र, आयसीआयसीआय बँक, जनता सहकारी बँक, कॉसमॉस बँक; तसेच ऑनलाइन प्रणालीद्वारे पैशांचा भरणा करता येणार आहे. महापालिकेच्या propertytax.punecorporation.org या संकेतस्थळावरून कर ऑनलाइन भरता करता येईल; तसेच महापालिकेची सर्व नागरी सुविधा केंद्रे शनिवारी व रविवारी; तसेच सार्वजनिक सुट्टीच्या दिवशीदेखील सुरू राहतील, अशी माहिती अतिरिक्त आयुक्त पृथ्वीराज बी. पी. यांनी दिली.

शहरातील 'मिसिंक लिंक जोडण्यासाठी भूसंपादनाचा मोठा प्रश्न आहे. या भूसंपादनासाठी निधीची आवश्यकता असून, अभय योजनेतून मिळणारी रक्कम या भूसंपादनासह इतर मोठ्या प्रकल्पासाठी राबविण्यात येईल. -नवलकिशोर राम, महापालिका आयुक्त