पुण्यातील दारूकांडातील १७ मृत्यूंचं पाप कोणाचं? एक्साईज SP अतुल कानडेंवर कारवाई कधी होणार?

पुणे: पुणे आणि पिंपरी-चिंचवड परिसरात पसरलेल्या विषारी दारूच्या जाळ्याने आतापर्यंत १७ निष्पाप नागरिकांचा बळी घेतला आहे. या दुर्घटनेने संपूर्ण राज्य हादरले असून, प्रशासकीय निष्काळजीपणाचा मोठा प्रश्न ऐरणीवर आला आहे. फुगेवाडी, दापोडी, गोखलेनगर आणि हडपसर यांसारख्या भागांत गेल्या अनेक वर्षांपासून अवैध दारूचे अड्डे जोमात सुरू होते, मात्र राज्य उत्पादन शुल्क विभागाने याकडे सोयीस्कर दुर्लक्ष केल्याचा आरोप होत आहे.

प्रशासनाची कारवाई आणि प्रश्नचिन्ह दारूकांड उघडकीस आल्यानंतर राज्य उत्पादन शुल्क विभागाने १३ कनिष्ठ अधिकारी आणि कर्मचाऱ्यांना (ज्यात ३ निरीक्षक, ६ उपनिरीक्षक आणि ४ कॉन्स्टेबलचा समावेश आहे) निलंबित केले आहे. मात्र, या संपूर्ण यंत्रणेचे प्रमुख असलेल्या वरिष्ठ अधिकारी आणि राज्य उत्पादन शुल्क विभागाचे अधीक्षक अतुल कानडे यांच्यावर अद्याप कोणतीही ठोस कारवाई झालेली नाही.

अतुल कानडे यांची जबाबदारी: पिंपरी-चिंचवडसाठी नोव्हेंबर २०२५ पासून स्वतंत्र अधीक्षकपद मंजूर असूनही ते अद्याप रिक्त आहे. त्यामुळे पुणे आणि पिंपरी-चिंचवड अशा दोन्ही मोठ्या शहरांचा अतिरिक्त कार्यभार अतुल कानडे यांच्याकडेच आहे. ज्या काळात या दोन्ही शहरांत अवैध दारूचे जाळे बळकट झाले, त्या काळात या विभागाचे नेतृत्व कानडे करत होते. त्यामुळे, १७ जणांच्या मृत्यूला जबाबदार कोण आणि वरिष्ठ अधिकाऱ्यांना पाठीशी का घातले जात आहे, असे संतप्त सवाल आता उपस्थित केले जात आहेत. पीडित कुटुंबीयांच्या आयुष्याची राखरांगोळी झाली असताना, वरिष्ठ अधिकाऱ्यांवरील ही 'मेहेरबानी' प्रशासनाच्या विश्वासार्हतेवर प्रश्नचिन्ह निर्माण करत आहे.