Pune : पुण्यात दृश्यम स्टाइल हत्याकांड; पत्नीला संपवलं, बॉडी भट्टीत जाळली, राख नदीत फेकली अन्.., पतीचं संतापजनक कृत्य

Pune : अनैतिक संबंधांच्या संशयावरून पत्नीचा गळा आवळून खून केल्यानंतर तिचा मृतदेह लोखंडी भट्टीत जाळणाऱ्या पतीला वारजे पोलिसांनी बेड्या ठोकल्या. पतीने पुरावा नष्ट करण्यासाठी जाळलेल्या मृतदेहाची राख नदीत टाकून देऊन लोखंडी भट्टीची विल्हेवाट लावली. त्यानंतर पत्नी बेपत्ता असल्याची तक्रार पोलिसांकडे देऊन ‘माझ्या पत्नीला कधी शोधणार,’ अशी वारंवार चौकशीही केली. मात्र, पोलिसांच्या तपासात त्याचे बिंग फुटले अन् ‘दृश्यम’ चित्रपटाच्या कथेप्रमाणे खून पचविण्याचा प्रयत्न करणाऱ्या पतीचा पोलिसांनी पर्दाफाश केला.

अंजली समीर जाधव (वय ३८) असे खून झालेल्या महिलेचे नाव आहे. या प्रकरणी समीर पंजाबराव जाधव (वय ४२, दोघे रा. शिवणे) याला अटक करण्यात आली आहे. त्याच्याविरोधात वारजे पोलिस ठाण्यात खुनाचा गुन्हा दाखल करून तो राजगड पोलिस ठाण्याकडे तपासासाठी हस्तांतर करण्यात आला आहे. ही घटना २६ ऑक्टोबर रोजी मुंबई-बेंगळुरू महामार्गावरील शिंदेवाडी परिसरातील गोगलवाडी फाटा येथील एका गोदामात घडली. त्यानंतर दोन दिवसांनी पत्नी अंजली वारजे परिसरातून बेपत्ता झाल्याची तक्रार आरोपी समीर याने वारजे माळवाडी पोलिस ठाण्यात दिली होती. ‘कोणतेही धागेदोरे नसताना पोलिसांनी सखोल तपास करून या गुन्ह्याचा छडा लावून आरोपीला अटक केली,’ असे परिमंडळ तीनचे पोलिस उपायुक्त संभाजी कदम यांनी सांगितले.

Cyclone Alert : महाराष्ट्रावर नव्या वादळाचा धोका वाढला, पुढील २४ तास अत्यंत महत्त्वाचे; सतर्कतेचे आदेश

आरोपी समीरचे शिवणे परिसरात गॅरेज असून, तो फॅब्रिकेशनची कामे करतो. त्याची पत्नी अंजली एका खासगी शाळेत शिक्षिका म्हणून काम करायची. समीर अंजलीच्या चारित्र्यावर संशय घ्यायचा. तिच्या मोबाइलमधील चॅटिंगवरून त्याने अनैतिक संबंधांचे आरोप केले होते. त्यातून त्यांच्यामध्ये अनेक वेळा भांडणे झाली. त्या रागातून पतीने पत्नीचा खून करण्याचा कट रचला. त्यासाठी त्याने खेड शिवापूर येथील शिंदेवाडी भागातील गोगलवाडी फाट्यापासून दोन किलोमीटर अंतरावर एक गोदाम भाडेतत्त्वावर घेतले. त्या ठिकाणी आरोपीने लोखंडी भट्टी तयार केली. त्यानंतर कर्वेनगर येथील वनदेवी परिसरातील वखारीतून दोन पोती लाकडे विकत घेऊन गोदामात ठेवली.

गुन्ह्याचे नियोजन पूर्ण झाल्यानंतर २६ ऑक्टोबर रोजी समीरने अंजलीला फिरायला नेण्याचा बहाणा करून चारचाकीतून खेड शिवापूरजवळील मरीआई घाटात नेले. तेथून परतताना त्यांनी शिंदेवाडी येथील गोगलवाडी फाटा येथून भेळ घेतली. त्यानंतर समीर अंजलीला घेऊन गोदामात गेला. तिथे दोघे चटईवर बसून भेळ खात असताना, अचानक त्याने तिचा गळा दाबून खून केला. पत्नीचा मृत्यू झाल्याची खात्री पटल्यानंतर तिचा मृतदेह लोखंडी भट्टीत जाळला. त्याची राख नदीपात्रात टाकून दिली; तसेच लोखंडी भट्टी ‘स्क्रॅप’ केली, अशी कबुली समीरने चौकशीत दिली.

आरोपी समीरने अंजलीचा खून केल्यानंतर २८ ऑक्टोबर रोजी पत्नी गोगलवाडी फाटा येथून बेपत्ता झाल्याची तक्रार वारजे पोलिस ठाण्यात दिली होती. त्यामुळे या प्रकरणाचा तपास पुणे ग्रामीण पोलिसांच्या राजगड पोलिस ठाण्याकडे देण्यात आला. मात्र, पतीच्या वर्तनाबाबत संशय आल्याने वारजे पोलिसांनी समांतर पद्धतीने तपास सुरू ठेवला. पोलिसांनी पतीची कसून चौकशी केली. त्यामध्ये त्याने प्रारंभी उडवाउडवीची उत्तरे दिली. मात्र, पोलिसी खाक्या दाखविताच त्याने पत्नीचा खून केल्याची कबुली दिली.

पोलिस उपायुक्त संभाजी कदम, सहायक आयुक्त भाऊसाहेब पठारे यांच्या मार्गदर्शनाखाली वरिष्ठ निरीक्षक विश्वजित काईंगडे, गुन्हे शाखेचे निरीक्षक प्रकाश धेडे, नीलेश बडाख, उपनिरीक्षक संजय नरळे, नितीन गायकवाड, गणेश कर्चे, सुनील मुठे, योगेश वाघ, शरद पोळ, शिरीष गावडे यांच्या पथकाने ही कामगिरी केली.