Pune : महादेवाचा अवतार असल्याचा दावा करत पुण्यातील महिलेवर लॉजमध्ये अत्याचार; स्वयंघोषित धर्मगुरूला अखेर अटक

Pune : महादेवाचा अवतार असल्याचे सांगून महिलेवर बलात्कार करणारा वसईतील स्वयंघोषित धर्मगुरू ऋषिकेष वैद्य याला अखेर अटक करण्यात आली आहे. नाशिकमधील भोंदू अशोक खरातचे कारनामे उघड झाल्यानंतर आरोपी ऋषिकेष वैद्यच्या अत्याचाराने पीडित महिलेने हिंमत दाखवून पोलिसांकडे धाव घेतली. तिने वसईतील माणिकपूर पोलिस ठाण्यात तक्रार दिली. गुन्हा पुण्यात घडला असल्याने वसई पोलिसांनी तपासासाठी मांजरी पोलिसांकडे वर्ग केला होता. याप्रकरणी आरोपी ऋषिकेष वैद्य याच्या शोधासाठी पुणे पोलिसांनी चार पथके तयार केली होती. अखेर पुण्याजवळील पिंपरी शहरातून पोलिसांनी आज त्याला अटक केल्याचे समजते.

याबाबतची सविस्तर माहिती अशी की, ‘वसईतील स्यवंघोषित धर्मगुरू आणि ‘आमची वसई’ ही सामाजिक संघटना चालवणाऱ्या ऋषिकेश वैद्य याच्या विरोधात नुकतीच पुण्यातील ३५ वर्षीय विवाहित महिलेने तक्रार दिली होती. हा गुन्हा पुण्यातील मांजरी पोलिस ठाण्यात वर्ग करण्यात आला. त्यानंतर आरोपीच्या शोधासाठी आम्ही चार पथके तयार केली असून ती विविध जिल्ह्यांत त्याचा शोध घेत आहेत, त्याच्या विरोधातील गुन्ह्यांत आणखी कलमांची वाढ केली जाईल,’ अशी माहिती पुणे शहराचे पोलिस उपायुक्त निखिल पिंगळे यांनी माध्यमांशी बोलताना दिली होती. त्यानंतर वैद्य हा आपल्या नातेवाईकांकडे जात असल्याची माहिती मिळाल्यानंतर पोलिसांनी त्याला पिंपरीतून अटक केली असून आज दुपारी त्याला शिवाजीनगर कोर्टात हजर केले जाणार आहे.

नाशिकमधील भोंदू अशोक खरातने उपासनेच्या नावाखाली महिलांचे लैंगिक शोषण केल्याच्या घटनांनी राज्यात गदारोळ माजला असतानाच, देवाचा अवतार असल्याची बतावणी करून वसई येथील एका भोंदूने महिलेवर अत्याचार केल्याची घटना उघडकीस आली.

हृषीकेश वैद्य असे या भोंदू बाबाचे नाव आहे. त्याच्याविरोधात एका ३५ वर्षीय महिलेने तक्रार दिली आहे. पीडित महिला मूळची पुण्यातील आहे. ऑक्टोबर २०२३मध्ये समाजमाध्यमांतून तिची ओळख वसई येथील हृषीकेश वैद्य याच्याशी झाली. पीडित महिला धार्मिक असून, व्रतवैकल्ये करते. आरोपीने तिला जाळ्यात ओढले. ‘माझ्यामध्ये दैवी शक्तींचा संचार असून, ईश्वराची उपासना कशी करायची याचे तंत्र मी तुला शिकवतो,’ अशी बतावणी त्याने केली. हळूहळू त्याने महिलेचा विश्वास संपादन केला. नंतर तिला अध्यात्म शिकवण्याच्या बहाण्याने भेटण्यास बोलावले. त्यानंतर आरोपी २०२३मध्ये पुण्यात आला. त्याने महिलेला मांजरीतील एका लॉजवर नेऊन गुंगीकारक औषध पाजून तिच्यावर बलात्कार केला. त्या वेळी त्याने काही छायाचित्रे काढून तिला धमकावण्यास सुरुवात केली. आरोपीने तिला वसईत बोलवून तिथेही तिच्यावर अत्याचार केला, असे पीडितेच्या तक्रारीत नमूद आहे.