Pune : लग्नाचे फसवे वायदे आणि व्हायरल फोटोची धमकी; चंदननगरमध्ये दोन अल्पवयीन मुलींवर अत्याचार, नराधमांना अटक

Pune : चंदननगर परिसरात घडलेल्या दोन धक्कादायक घटनांनी शहराला हादरवून सोडलं आहे. अल्पवयीन मुलींना प्रेम आणि लग्नाचं आमिष दाखवत त्यांच्यावर अत्याचार केल्याचं समोर आलं आहे. या प्रकारांमुळे परिसरात संताप व्यक्त होत आहे. एका घटनेत बालाजी गुरुनाथ स्वामी (वय २७, रा. लक्ष्मीनगर, येरवडा) याने अल्पवयीन मुलगी असल्याचं माहिती असूनही तिला गोड बोलून आपल्या जाळ्यात ओढलं. तिचा विश्वास जिंकत त्याने वेळोवेळी तिच्यावर अत्याचार केला. हा प्रकार समोर आल्यानंतर मुलीच्या आईने जाब विचारला असता, आरोपी थेट त्यांच्या घरात घुसला आणि आई-वडिलांना जीवे मारण्याची धमकी दिली, असा आरोप करण्यात आला आहे.

दुसरी घटना
तर दुसऱ्या घटनेत ऋतिक रावसाहेब लोणके (वय २७, रा. सोमनाथनगर, वडगाव शेरी) यानेही असाच प्रकार केल्याचं उघड झालं. त्याने अल्पवयीन मुलीला लग्नाचं आमिष दाखवलं आणि तिच्यावर अत्याचार केला. एवढंच नाही, तर तिच्यासोबत बोलून दिले नाही तर तिचे फोटो सोशल मीडियावर व्हायरल करण्याची धमकी देत तिला गप्प ठेवण्याचा प्रयत्न केला.

पोक्सो गुन्हा दाखल
या दोन्ही घटनांमध्ये पीडित कुटुंबांनी पुढे येत तक्रार केल्यानंतर हे प्रकार उघड झाले आहेत. या घटनांमुळे परिसरात भीतीचं वातावरण निर्माण झालं आहे. दोन्ही आरोपींवर पोक्सो अंतर्गत चंदननगर पोलीस ठाण्यात गुन्हा दाखल झाला आहे आणि अटक करण्यात आली आहे. दरम्यान, वाघोली आणि हडपसर भागातही अल्पवयीन मुलींना फूस लावून पळवून नेण्याच्या घटना समोर आल्याने शहरात अशा गुन्ह्यांमध्ये वाढ होत असल्याची चिंता व्यक्त केली जात आहे.

फसवणुकीच्या घटनांमध्ये वाढ
या सगळ्या पार्श्वभूमीवर पालकांनी मुलींच्या सुरक्षिततेबाबत अधिक जागरूक राहण्याची गरज अधोरेखित होत आहे. मात्र वाढत्या अल्पवयीन मुलींच्या फसवणूकीचा प्रश्न देखील तिथकाच गंभीर होत आहे. सोशल मीडिया वरील मैत्री आणि तेथून होणारी फसवणूक एकीकडे वाढली असताना आता लग्नाचे आमिष दाखवून मुलींना फसवण्याच्या घटनामध्ये देखील वाढ होत आहे.

अशा घटनानंतर शहरातील मुली स्वतःला असुरक्षित मानत असल्याचे देखील सांगण्यात येत आहे. त्यामुळे अशा आरोपीवर कठोर शिक्षा व्हायला पाहिजे आणि अशा घटना कमी व्हयला पाहिजेत अशी मागणी देखील नागरिक करताना पाहायला मिळत आहेत.