Pune Accident News : सुसाट बाईक पळवली, नियंत्रण सुटल्याने विजेच्या खांबला धडकला; तरुणाचा जागीच मृत्यू

मिळालेल्या माहितीनुसार, यशोधन अविनाश देशमुख (२३ वर्षे) याचा अपघातामध्ये मृत्यू झाला. तर त्याचा मित्र हर्षल दिपक पाटील (२४ वर्षे) हा अपघातामध्ये गंभीर जखमी झाला आहे. हे दोन्ही तरुण जळगावचे असून पुण्यातील बावधनमधील पेंबल्स अर्बनीया सोसायटीमध्ये राहतात. यशोधन आणि हर्षल हे खडकवासला परिसरात फिरायला गेले होते. यावेळी यशोधन सुसाट बाईक चालवत होता. त्याचे बाईकवरील नियंत्रण सुटले आणि अपघात झाला.

कुडजे गावाहून मुख्य रस्त्याने पुढे आगळंबे फाट्याकडे जाताना साहिल हॉटेलच्या जवळ यशोधनचा बाईकवरील ताबा सुटला. त्याची बाईक विजेच्या लोखंडी खांबाला जाऊन जोरात धडकली. या अपघातामध्ये यशोधनच्या डोक्याला गंभीर दुखापत झाली आणि त्याचा जागीच मृत्यू झाला. तर हर्षल गंभीर जखमी झाला. या अपघातामध्ये बाईकचे नुकसान झाले. त्याचसोबत विजेचा खांब वाकला, अशी माहिती उत्तमनगर पोलिसांनी दिली.

गंभीर जखमी झालेल्या हर्षल पाटीलवर खासगी रुग्णालयात उपचार सुरु आहेत. यशोधनच्या मृतदेहावर ससून रुग्णालयात शवविच्छेदन करण्यात आले. त्यानंतर त्याचा मृतदेह नातेवाईकाच्या ताब्यात देण्यात आला. चाळीसगावमधील गावामध्ये त्याच्या मृतदेहावर अंत्यसंस्कार करण्यात आले. उत्तमनगर पोलिस या प्रकरणाचा तपास करत आहे. या घटनेमुळे यशोधनच्या कुटुंबीयांवर दु:खाचा डोंगर कोसळला आहे.