नाशिक: पेठ पोलीस ठाण्याचा अंमलदार ९० हजारांची लाच घेताना एसीबी च्या जाळ्यात.

नाशिक: गुटखा तस्करीचा खोटा गुन्हा दाखल करण्याची धमकी देऊन चिकन व्यावसायिकाकडून ९० हजार रुपयांची लाच स्वीकारताना पेठ पोलीस ठाण्याचा अंमलदार मनोज दगू गायकवाड (वय ३७) याला लाचलुचपत प्रतिबंधक विभागाने (ACB) रंगेहात पकडले आहे.

प्रकरण काय? तक्रारदार हे कोंबड्यांचा व्यवसाय करतात आणि महाराष्ट्रातून कोंबड्या खरेदी करून गुजरातला ने-आण करतात. जून महिन्यात वांगणी परिसरात मनोज गायकवाड याने त्यांना अडवले आणि 'तू गुटख्याची अवैध तस्करी करतोस, तुझ्यावर गुन्हा दाखल करतो' अशी धमकी दिली. त्यावेळी तक्रारदाराने स्पष्टीकरण देण्याचा प्रयत्न केला, मात्र गायकवाडने गुन्हा न दाखल करण्यासाठी सुरुवातीला ६० हजार रुपये उकळले.

 

त्यानंतर ५ जुलै २०२६ रोजी गायकवाडने पुन्हा फोन करून गाड्या सुरळीत जाऊ देण्यासाठी १ लाखांच्या लाचेची मागणी केली, जी तडजोडीनंतर ९० हजार रुपयांवर ठरली.

कारवाई: तक्रारदाराने नाशिक एसीबीकडे तक्रार केल्यानंतर सापळा रचण्यात आला होता. नाशिकमधील एका हॉटेलसमोरील चहाच्या दुकानाजवळ ९० हजारांची लाच स्वीकारताना संशयित गायकवाडला रंगेहात ताब्यात घेण्यात आले.

या प्रकरणी म्हसरूळ पोलीस ठाण्यात संशयिताविरुद्ध गुन्हा दाखल करण्यात आला असून, एसीबीचे पोलीस अधीक्षक भारत तांगडे, अप्पर अधीक्षक प्रदीप मैराळे, कविता फडतरे यांच्या मार्गदर्शनाखाली उपअधीक्षक सुरेश शिरसाठ आणि पोलीस निरीक्षक नेहा सूर्यवंशी यांनी ही कारवाई पूर्ण केली