Nashik : मंतरलेलं पाणी पाजून अत्याचाराचा आरोप; अशोक खरातमुळे पीडिता गरोदर, औषध देऊन गर्भपात—भोंदूगिरीच्या ‘कॅप्टन’ची काळी कृत्ये उघड

Nashik : दैवी शक्ती, भविष्यातील घटनांची भीती दाखवून महिलेवर अत्याचार केल्याप्रकरणी अशोककुमार खरात उर्फ ‘कॅप्टन’ याच्या कुकर्मांचा पेटारा आता उघड झाला आहे. खरातच्या ४८ मालमत्तांची कागदपत्रे एका तरुणाने पोलिसांत दिली असून, खरातच्या गैरकृत्यांचे सबळ पुरावे असणारा ‘पेन ड्राइव्ह’ देण्याचाही दावा केला आहे. यासह एका गर्भवतीचा, तर अन्य एका महिलेवर खरातने लैंगिक छळ केल्याप्रकरणी फिर्याद दाखल झाल्याने खरातविरुद्ध अत्याचारासह जादूटोणाविरोधी कायद्यान्वये तिसरा गुन्हा नोंद झाला आहे.

कुकर्मांची संपूर्ण ‘कुंडली’ उघड
नाशिकच्या सरकारवाडा पोलिसांत २८ वर्षीय पीडित महिलेने १७ मार्च २०२६ रोजी दिलेल्या फिर्यादीवरून अशोककुमार खरातविरुद्ध अत्याचारासह जादूटोणाविरोधी कायद्यान्वये गुन्हा नोंद आहे, तर रविवारी खरातच्या कार्यालयातील पूर्वाश्रमीच्या कर्मचाऱ्याने खरातविरुद्ध सरकारवाडा पोलिसांत फिर्याद दिली आहे. त्यामध्ये सबळ पुरावे फिर्यादीने सादर केल्याने खरातच्या कुकर्मांची संपूर्ण ‘कुंडली’ पोलिसांसमोर आता खुली झाली आहे. त्यामुळे खरातच्या अडचणींत वाढ झाली असून, त्याची पोलिस कोठडी वाढण्याची शक्यता आहे.

दरम्यान, खरातच्या फिर्यादीवरून वावी पोलिसांत डिसेंबर २०२५ मध्ये दोन संशयितांविरुद्ध खंडणीचा गुन्हा नोंद आहे. शिर्डी पोलिसांत एका पीडितेच्या फिर्यादीवरून खरातच्या ‘ऑफिस बॉय’विरुद्ध फेब्रुवारी २०२६ महिन्याच्या अखेरीस गुन्हा नोंद आहे. नाशिकच्या पीडितेने दिलेल्या फिर्यादीनुसार १७ मार्च रोजी एक आणि २२ मार्च रोजीचा दुसरा असे एकूण चार गुन्हे आता ‘एसआयटी’च्या चौकशीच्या फेऱ्यात अडकले आहेत. दरम्यान, नाशिकचे आयजी दत्तात्रेय कराळे यांनी खरातला पाठीशी घातल्याचा आरोप भूमाता ब्रिगेडच्या तृप्ती देसाई यांनी केला आहे. कराळे यांच्यासोबत खरात याचा फोटो आहे. खरातवर गेल्या वर्षी गुन्हा का नोंदला नाही? कारण आयजी कराळे तेथे आहेत, असा आरोप देसाई यांनी केला.

‘एसआयटी’ तपासातून...
संशयित खरातची महाराष्ट्र पोलिस अकादमीच्या गोपनीय ठिकाणी रविवारी दिवसभर चौकशी
संशयित खरातची नवीन गुन्ह्यात नाशिक शहर गुन्हे शाखा युनिट एकमार्फतही चौकशी
नाशिक शहर पोलिस आयुक्तालयातील वरिष्ठ अधिकाऱ्यांच्या कौशल्यामुळे नवीन फिर्यादी समोर
पीडितेच्या पतीने खरातच्या ४८ ठिकाणच्या मालमत्तांची कागदपत्रे पोलिसांना दिली
खरातच्या गैरकृत्यांचे व्हिडीओ असलेला पेन ड्राइव्ह पोलिसांना देण्याचे फिर्यादीकडून मान्य
संशयिताचे मोठे प्रस्थ व ओळखीमुळे फिर्यादी सुरुवातीला तक्रार देण्यास भीत होता

रानटी चिंचोक्यांची विक्री
खरात हा धार्मिक विधी व भविष्यवाणीच्या नावे अघोरी कृत्य करायचा. बाजारातून शंभर रुपये किलो दराने मिळणारे रानटी चिंचोके खरेदी करायचा. कापडाने घासून स्वच्छ केल्यानंतर ते खड्यासारखे चमकायचे. हे चिंचोके खरात ऑफिसमध्ये येणाऱ्यांना मंत्रून दहा हजार ते एक लाख रुपये दराने विक्री करायचा. नाशिकरोड येथील एक व्यक्ती हे नकली खडे खरातला आणून द्यायचा. यासह खरात हा पाच इंच जाड व वेगवेगळ्या लांबीची प्लॅस्टिकची पिवळी, नकली कापडी वाघ आणि नकली प्लास्टिकचा साप खरेदी करायचा. या साहित्यांद्वारे मिरगावच्या मंदिरात भाविकांना घाबरवून खरात ‘वसुली’ करायचा. त्यावेळी मिरगावच्या मंदिरात सेलिब्रिटी, राजकीय व्यक्ती आलिशान कारमधून खरातकडे यायचे. त्यांना मंदिरात पूजा करण्यास सांगून फोटो व व्हिडीओ खरात तयार करायचा, असेही समोर येत आहे.

‘एआय’च्या फोटो, व्हिडीओप्रकरणी गुन्हे
संशयित खरात याच्यासमवेत उभ्या असलेल्या किंवा त्याच्या कार्यालयात असलेल्या महिलांचे फोटो व व्हिडीओ सोशल मीडियावर व्हायरल होत आहेत. त्यापैकी बहुतांश फोटो व व्हिडीओ ‘एआय’द्वारे तयार केलेले आहेत. यासह काही फोटो व व्हिडीओ 'मॉर्फ' केलेले आहेत. या संदर्भात सायबर पोलिसांनी कठोर भूमिका घेतली असून, पीडितांसह संबंधित महिलांची बदनामी करणाऱ्या सोशल मीडिया वापरकर्त्यांवर गुन्हे नोंदविण्यात येणार आहेत.

खरातमुळे महिला गर्भवती
एका गर्भवती महिलेवर अत्याचार केल्याप्रकरणी खरातवर दुसरा गुन्हा दाखल झाल्यानंतर आता आणखी पीडितेवरील अत्याचार प्रकरणी तिसरा गुन्हा दाखल झाला आहे. पीडितेवर १ फेब्रुवारी २०२० ते १८ मार्च २०२६ दरम्यान अत्याचार केल्याप्रकरणी खरातवर सरकारवाडा पोलिस ठाण्यात तिसरा गुन्हा दाखल झाला आहे. संशयित खरातने ३३ वर्षीय महिलेला कार्यालयात बोलावले. कार्यालयात एकांतात असताना तांब्याच्या बाटलीमधील मंतरलेले पाणी पिण्यास देऊन धार्मिक विधीच्या नावाखाली वेळोवेळी पीडितेशी शारीरिक संबंध ठेवले. त्यातून पीडिता गर्भवती राहिल्याने खरातने औषध देत गर्भपात घडवून आणला.