मोठी बातमी : अशोक खरातला 14 दिवसांची न्यायालयीन कोठडी; 5 मिनिटांत कोर्टातून बाहेर

Nashik : भोंदूबाबा अशोक खरात याला आज (1 एप्रिल) नाशिक जिल्हा व सत्र न्यायालयात हजर करण्यात आले. पोलीस कोठडीची मुदत संपल्यानंतर झालेल्या सुनावणीत न्यायालयाने त्याला 14 दिवसांची न्यायालयीन कोठडी सुनावली.

न्यायाधीश श्रीमती बी. इन. ईचपुरानी यांच्या न्यायालयात ही सुनावणी पार पडली. विशेष म्हणजे, संपूर्ण प्रक्रिया अवघ्या 5 मिनिटांत पूर्ण झाली आणि मोठ्या बंदोबस्तात आणलेल्या खरातला तत्काळ कोर्टरूममधून बाहेर काढण्यात आले.

 

कोर्टात काय घडलं?

*  तपास अधिकारी किरण कुमार सूर्यवंशी आणि सरकारी वकील शैलेंद्र बागडे उपस्थित
* न्यायालयाने कागदपत्रांची पाहणी केली
* कोणताही मोठा युक्तिवाद न होता थेट निर्णय
* 14 दिवसांची न्यायालयीन कोठडी सुनावली

---

एसआयटी तपासात नवे धक्कादायक मुद्दे

एसआयटीकडून पुण्यातील एका सीए, ईशान्येश्वर मंदिराचा पुजारी आणि सराफा व्यावसायिक यांची समोरासमोर चौकशी करण्यात आली. सुमारे सहा तास चाललेल्या या चौकशीत काही महत्त्वाच्या बाबी समोर आल्या असल्याची माहिती सूत्रांकडून मिळते.

* रत्न, खडे आणि सोन्याच्या व्यवहारात फसवणुकीचा संशय
* बँक कर्ज प्रकरणात अनियमितता
* एक कोटी रुपयांच्या लाचेचा संशय
* सोन्याच्या खरेदी-विक्रीतून मोठा नफा

 प्रकरण नेमकं काय?

नाशिकमधील सरकारवाडा पोलीस ठाण्यात अशोक खरातविरोधात बलात्काराचा गुन्हा दाखल आहे. एका 35 वर्षीय महिलेवर गुंगीचे औषध देऊन अत्याचार केल्याचा आरोप आहे. 18 मार्च रोजी पहाटे त्याला अटक करण्यात आली होती.
कोण आहे अशोक खरात?

सिन्नर तालुक्यातील मिरगाव येथील श्री ईशान्येश्वर मंदिर ट्रस्टचा अध्यक्ष असलेला अशोक खरात हा मर्चंट नेव्हीमधील निवृत्त अधिकारी आहे. अंकशास्त्रज्ञ म्हणून ओळख निर्माण करत त्याने अनेक राजकीय नेते, उद्योजक आणि सेलिब्रिटींशी संपर्क ठेवला होता.

पुढे काय?

अशोक खरातविरोधात तक्रारी वाढत असून एसआयटी तपास अधिक तीव्र झाला आहे. येत्या काळात आणखी धक्कादायक खुलासे होण्याची शक्यता वर्तवली जात आहे.