सदरक्षणाय खलनिग्रहणाय'चा विसर? पोलीस कोठडीत महिलेकडे शरीरसुखाची मागणी; एएसआय निलंबित

 Akola :महाराष्ट्र पोलिसांचे ‘सदरक्षणाय खलनिग्रहणाय’ हे ब्रीदवाक्य प्रत्यक्षात कितपत पाळले जाते, यावर प्रश्नचिन्ह उपस्थित करणारी धक्कादायक घटना अकोल्यात समोर आली आहे.

अकोला शहरातील सिव्हिल लाईन पोलीस ठाण्यात पोलीस कोठडीत असलेल्या एका महिला आरोपीकडे ड्युटीवरील सहाय्यक पोलीस उपनिरीक्षकानेच शरीरसुखाची मागणी केल्याचा गंभीर आरोप आहे. राजेश जाधव असे संबंधित एएसआयचे नाव असून, या प्रकरणामुळे पोलीस विभागात खळबळ उडाली आहे.

मिळालेल्या माहितीनुसार, ८० लाखांच्या आर्थिक फसवणूक प्रकरणात अटकेत असलेल्या महिलेला लॉकअपमध्ये ठेवण्यात आले होते. याच दरम्यान, संबंधित अधिकाऱ्याने त्या महिलेला “तुझ्या मुलीला माझ्याकडे पाठव, १० हजार रुपये देतो” अशी मागणी केल्याचा आरोप करण्यात आला आहे.

या घटनेनंतर वरिष्ठ अधिकारी घटनास्थळी दाखल झाले. त्यांनी पीडित महिलेचे म्हणणे ऐकून घेतले आणि संताप व्यक्त केला. संबंधित अधिकाऱ्यावर तात्काळ निलंबनाची कारवाई करण्यात आली असून, छेडछाडीचा गुन्हा देखील दाखल करण्यात आला आहे. मात्र, अद्याप अटक झालेली नाही.

दरम्यान, या घटनेचा व्हिडिओ समोर आल्याची माहिती असून, त्यामध्ये वरिष्ठ अधिकाऱ्यांनी संबंधित एएसआयला जाब विचारताना दिसत आहे. “वर्दी घालून असे कृत्य करताना लाज वाटली नाही का?” असा सवालही त्यांनी केला.

या प्रकारानंतर पोलीस ठाण्यात मोठा गोंधळ उडाला होता. सध्या या प्रकरणाची चौकशी सुरू असून, महिला सुरक्षेबाबत गंभीर प्रश्न निर्माण झाले आहेत.

महत्वाचा मुद्दा: पोलीस कोठडीसारख्या सुरक्षित ठिकाणीच महिलांची सुरक्षा धोक्यात येत असल्याचे या घटनेतून समोर आले आहे.