Mukesh Ambani Threat : उद्योगपती मुकेश अंबानी यांना पुन्हा जीवे मारण्याची धमकी; पोलिसांकडून चौकशी सुरू

Mukesh Ambani Threat : प्रसिद्ध उद्योगपती मुकेश अंबानी यांना पुन्हा एकदा जीवे मारण्याची धमकी देण्यात आली आहे. धमकी देणाऱ्या व्यक्तीने मुकेश अंबानी यांच्याकडे २० कोटी रुपयांची मागणी केली आहे. जर पैसे दिले नाहीत, तर ठार मारू असं धमकी देणाऱ्या व्यक्तीने म्हटलं आहे. या घटनेनं मोठी खळबळ उडाली आहे.

सूत्रांनी दिलेल्या माहितीनुसार २७ ऑक्टोबर रोजी एका अज्ञात व्यक्तीने मुकेश अंबानी  यांच्या ईमेल आयडीवर धमकीचा ईमेल पाठवला होता. “तुम्ही आम्हाला २० कोटी रुपये दिले नाहीत, तर आम्ही तुम्हाला मारून टाकू, आमच्याकडे भारतात सर्वोत्तम शूटर आहेत”, असं धमकी देणाऱ्या व्यक्तीने ई-मेलमध्ये म्हटलं होतं.

Maratha Reservation : मराठा आरक्षणासाठी आंदोलक आक्रमक, विदर्भात नेत्यांना 'या' गावात करण्यात आली गावबंदी

धमकीचा ई-मेल आल्यानंतर, मुकेश अंबानी यांच्या सुरक्षा प्रभारींनी पोलिसांत धाव घेतली. याप्रकरणी गावदेवी पोलिसांनी आयपीसीच्या कलम ३८७ आणि ५०६ (२) अंतर्गत अज्ञात व्यक्तीविरुद्ध एफआयआर नोंदवून तपास सुरू केला आहे.

दरम्यान, मुकेश अंबानी यांना जीवे मारण्याची धमकी आल्याची ही काही पहिलीच वेळ नाही. यापूर्वी २०२२ मध्ये देखील त्यांना जीवे मारण्याची धमकी मिळाली होती. धमकीनंतर पोलिसांनी अवघ्या ३ तासांतच आरोपीला अटक केली होती.

काही दिवसांपूर्वी नागपूर पोलिसांना देखील अज्ञात व्यक्तीने फोन करुन उद्योगपती मुकेश अंबानी, यांचे बंगले बॉम्बने उडवून देण्याची धमकी दिली होती. या धमकीची पोलिसांनी गंभीर दखल घेतली होती. याप्रकरणी बिहार येथील एका व्यक्तीला अटक करण्यात आली होती.