रत्नागिरी: रत्नागिरीत सायबर गुन्हेगाराचा एकाच बँक खात्यावरून देशभरातील ५२ जणांना आर्थिक गंडा, गुन्हा दाखल

रत्नागिरी: अलीकडे बँकिंग अथवा आर्थिक क्षेत्रातील ऑनलाईन फसवणुकीच्या तक्रारी वाढल्या आहेत. असाच एक धक्कादायक प्रकार रत्नागिरी शहर पोलीस ठाण्याच्या हद्दीत घडला आहे. रत्नागिरी शहरातील बँक ऑफ महाराष्ट्र शाखा शिवाजीनगर येथील एक खातेधारक देशातील तब्बल ५२ फसवणुकीच्या तक्रारींमध्ये सहआरोपी असल्याची माहिती समोर येत आहे. रत्नागिरी येथील सायबर पोलीस ठाण्यात किंवा शहर पोलीस ठाण्यात या खातेदाराविरोधात तक्रार दाखल झाली आहे.

आपले खाते दुसऱ्याला वापरायला दिले
केंद्र शासनाच्या सायबर विभागाकडून जिल्ह्यातील विविध पोलीस स्थानकाच्या हद्दीतील अशा स्वरूपाची माहिती जिल्हा पोलीस अधीक्षक कार्यालयाला प्राप्त झाली आहे. रत्नागिरी शहर पोलीस ठाण्याच्या हद्दीतील ही एक तक्रार आहे. म्युअल अकाउंट अंतर्गत आपले खाते दुसऱ्याला वापरण्यास देऊन कमिशन घेणे हा नवा फंडा यामुळे समोर आला आहे. या सगळ्याची गंभीर दखल केंद्र आणि राज्य शासनाच्या सायबर सेलने घेतली आहे.

 

जिल्ह्यात पहिला गुन्हा दाखल
म्युअल अकाउंट शोधून संशयास्पद व्यवहार आढळले आहेत, अशा अकाउंटची माहिती जिल्हा पोलीस अधीक्षकांना देण्यात आली आहे. रत्नागिरी शहरात याच अंतर्गत हा पहिला गुन्हा दाखल झाला आहे. अशा स्वरूपाचे आणखी काही अन्य खातेधारकांचे संशयास्पद अकाउंट रत्नागिरी, चिपळूण, राजापूर, मंडणगड तालुक्यात असल्याची माहिती सूत्रांनी दिली आहे.

आतापर्यंत ५२ तक्रारी
या अकाउंटच्या माध्यमातून १ जानेवारी २०२६ पासून ते आजपर्यंत सात महिन्यात अनेकांना ऑनलाईन आर्थिक फसवणूक करून गंडा घातल्याच्या एकूण ५२ तक्रारी दाखल झाल्या आहेत. तोतयेगिरी करत दिशाभूल करून विश्वास संपादन करून हे आर्थिक गुन्हे करण्यात आले आहेत. रत्नागिरी येथील संशयित असलेल्या या खातेदाराने अन्य आरोपींशी संगनमत करून देशभरातील विविध भागात दाखल असलेल्या एकूण ५२ तक्रारींमधील नागरिकांची विविध क्लृप्ती वापर करून ऑनलाइन माध्यमाद्वारे नागरिकांची फसवणूक केली आहे.

ही घटना १ जानेवारी २०२६ ते आजपर्यंत बँक ऑफ महाराष्ट्र शाखा शिवाजीनगर, रत्नागिरी येथे घडली आहे. संशयित खातेधारकाने इतर आरोपींशी संगनमत करून देशभरातील विविध भागात दाखल असलेल्या एकूण ५२ सायबर तक्रारींमधील नागरिकांची विविध फसवणुकीच्या माध्यमातून दिशाभूल आणि तोतयेगिरी केली.

गुन्हा दाखल
या प्रकरणी शहर पोलीस ठाण्याचे पोलीस वैभव शिवलकर यांनी शहर पोलीस ठाण्यात तक्रार दिली. तक्रारीवरून पोलिसांनी अज्ञात संशयित बँकेच्या खातेधारकाविरुद्ध गुन्हा दाखल केला आहे. अधिक तपास रत्नागिरी शहर पोलीस करत आहेत.