नाशिक: "देवा, आम्ही तुझ्या सेवेसाठी येत आहोत" भयंकर; पतीने पत्नी आणि मुलाची केली हत्या, स्वतःही संपवण्याचा प्रयत्न

नाशिक: जेलरोड परिसरातील वसंत विहार (गोकुळ नगर) येथे एका पतीने गाढ झोपेत असलेल्या आपल्या पत्नीची आणि अवघ्या सात वर्षांच्या मुलाची अत्यंत निर्घृणपणे हत्या केल्याची थरारक घटना समोर आली आहे. या घटनेने संपूर्ण नाशिक शहर पुन्हा एकदा हादरले असून परिसरात मोठी शोककळा पसरली आहे.

नेमकी घटना काय?
मिळालेल्या माहितीनुसार, आरोपी पतीने घटनेच्या दिवशी सायंकाळी कामावरून घरी परतताना दुकानातून घरगुती कामासाठी लागणारा 'चॉपर' (धारदार हत्यार) विकत आणला होता. रात्री त्याने पत्नी आणि मुलासोबत जेवण केले. ते सर्वजण गाढ झोपेत असताना, पहाटेच्या सुमारास आरोपीने त्यांच्या डोक्यावरून हात फिरवला आणि त्यानंतर टोकाचे पाऊल उचलत पत्नी आणि पोटच्या मुलावर चॉपरने सपासप वार करत त्यांची हत्या केली. यानंतर त्याने स्वतःच्या हाताची नस कापून आणि विष प्राशन करून आत्महत्येचा प्रयत्न केला.

कशी उघडकीस आली घटना?
सोमवारी सकाळी नेहमीप्रमाणे उशीर झाला तरी किरण याच्या घराचा मुख्य दरवाजा उघडला नाही आणि बाजूची खिडकी अर्धवट उघडी होती. दुपारी आजूबाजूच्या रहिवाशांनी शंका आल्याने खिडकीतून आत डोकावून पाहिले, तेव्हा जमिनीवर रक्ताच्या थारोळ्यात तिघेजण निपचित पडलेले दिसले. नागरिकांनी तात्काळ चाळ मालकाला आणि पोलिसांना याची माहिती दिली.

पोलिसांनी घटनास्थळी दाखल होत दरवाजाची कडी तोडून आत प्रवेश केला असता, पत्नी अश्विनी आणि मुलगा सुयश मृत अवस्थेत आढळले, तर पती किरण हा गंभीर जखमी अवस्थेत सापडला. पोलिसांनी त्याला तातडीने उपचारासाठी रुग्णालयात दाखल केले. प्राथमिक तपासात आर्थिक विवंचनेतून किंवा कौटुंबिक कारणामुळे हे कृत्य घडल्याचा संशय व्यक्त केला जात असून, पोलीस या प्रकरणाचा अधिक सखोल तपास करत आहेत.