पुणे: लहानपणी बापाला संपवल्याचा वचपा; २३ वर्षांनंतर मुलाने रचला थरारक बदला

पुणे: एक अत्यंत थरारक आणि अंगावर काटा आणणारी घटना समोर आली आहे. २३ वर्षांपूर्वी आपल्या वडिलांच्या हत्येचा बदला घेण्यासाठी एका तरुणानं मित्रांच्या मदतीने केलेल्या खुनाचा कट पुणे ग्रामीण पोलिसांच्या स्थानिक गुन्हे अन्वेषण शाखा आणि राजगड पोलिसांनी उघडकीस आणला आहे. याप्रकरणी मुख्य सूत्रधारासह चार जणांना पोलिसांनी बेड्या ठोकल्या आहेत.

नेमकी घटना काय?
पुणे-सातारा महामार्गावरील जुन्या कात्रज बोगद्याजवळ शिंदेवाडी परिसरात ११ जुलैच्या रात्रीच्या सुमारास संजय बाबूराव कडू-देशमुख (वय ४०, रा. मुंढवा, पुणे, मूळ रा. कुरण, ता. वेल्हे) या सराईत गुन्हेगारावर धारदार शस्त्राने बेछूट वार करून खून करण्यात आला होता. याप्रकरणी राजगड पोलीस ठाण्यात खुनाचा गुन्हा दाखल करण्यात आला होता. या प्रकरणाचा तपास करत असताना पोलिसांनी तांत्रिक पुराव्यांच्या आणि सीसीटीव्ही फुटेजच्या आधारे आरोपींचा शोध घेतला.

वडिलांच्या खुनाचा २३ वर्षांनंतर बदला
पोलिसांच्या कसून चौकशीत समोर आले की, मुख्य आरोपी मंथन दिनेश वैद्य (वय २४/२५, रा. जोशी वाडा, सदाशिव पेठ, पुणे) याच्या वयाच्या अवघ्या सहाव्या महिन्यात (२००३ मध्ये) मृत संजय कडू-देशमुख याने एका क्षुल्लक कारणावरून व पूर्वद्वेषातून मंथनचे वडील दिनेश वैद्य यांचा खून केला होता.

वडिलांच्या हत्येचा हा राग मनात धरून लहानच्याचा मोठा झालेला मंथन वैद्य याने २३ वर्षांनंतर बापाच्या खुनाचा बदला घेण्याचा पक्का निर्णय घेतला. यासाठी त्याने आपल्या साथीदारांच्या मदतीने कट रचला.अशी झाली कारवाई आणि आरोपींची नावे पोलिसांनी या प्रकरणात कारवाई करत खालील चार जणांना अटक केली आहे:
१. मंथन दिनेश वैद्य (मुख्य सूत्रधार)
२. सौरभ सागर परदेशी (वय २४, रा. सदाशिव पेठ, पुणे)
३. मिझान गौसउद्दीन शेख (वय २४, रा. पर्वती दर्शन, पुणे)
४. संदीप बाबुलाल कोरी (वय ३१, रा. पर्वती दर्शन, पुणे)

पोलिसांनी केलेल्या तपासात उघड झाले की, मृत संजय कडू-देशमुख हा सराईत गुन्हेगार असून त्याच्यावर यापूर्वी खुनाचे चार गुन्हे दाखल होते आणि तो काही दिवसांपूर्वीच जामिनावर बाहेर आला होता. दरम्यान, आरोपी संदीप कोरी याच्याकडून पोलिसांनी एक देशी बनावटीचे पिस्तूल आणि तीन जीवंत काडतुसे जप्त केली आहेत. न्यायालयाने सर्व आरोपींना पोलीस कोठडी सुनावली असून राजगड पोलीस या प्रकरणाचा अधिक तपास करत आहेत.