Maharashtra Weather : हवामानाचा लहरी खेळ! दिवसा कडक ऊन, रात्री हुडहुडी; पुढील २४ तासांत पावसाची शक्यता, थंडीचाही जोर वाढणार

Pune : शहरासह उपनगरांमध्ये सध्या हवामानाचा लहरीपणा पाहायला मिळत आहे. गेल्या दोन ते तीन दिवसांपासून पुणेकर विचित्र हवामानाला सामोरे जात असून, दिवसा कडक ऊन आणि रात्री गारवा असं परस्परविरोधी वातावरण निर्माण झालं आहे. हवेली तालुक्यात तापमानाचा पारा सर्वाधिक खाली आला असून, येथे 10.9 अंश सेल्सिअस इतक्या नीचांकी तापमानाची नोंद झाली आहे.

हवामानात चढ-उतार
गेल्या आठवड्यात थंडीने काहीशी माघार घेतली होती. त्यावेळी किमान तापमान 14 ते 16 अंशांच्या घरात पोहोचल्याने वातावरणातील गारवा कमी झाला होता. मात्र, मागील 48 तासांत पुन्हा एकदा हवामानात बदल झाला आणि काही ठिकाणी पारा 9 अंशांपर्यंत खाली आला. यामुळे हवेली, एनडीए आणि पाषाण सारख्या उपनगरांमध्ये थंडीचा कडाका पुन्हा जाणवू लागला होता. असं असले तरी, आज पुन्हा दिवसाच्या कमाल तापमानात वाढ झाली आणि रात्रीच्या तापमानातही 1-2 अंशांची वाढ झाल्याने थंडीची तीव्रता काही प्रमाणात कमी-जास्त होत आहे.

Pune : पुण्यात 54 किमीचे भुयारी मार्ग; वाहतूक कोंडीसाठी ‘गेमचेंजर’, येरवडा–कात्रज, शनिवारवाडा–स्वारगेटसह कुठे-कसे असणार टनेल?

शहरातील काही भागात थंडी, तर काही भागात उष्णता
सध्या पहाटेच्या वेळी हलकं धुकं आणि सुखद गारवा, तर दुपारच्या वेळी उन्हाचे चटके असं चित्र आहे. विशेषतः एनडीए, वारजे, नांदेड फाटा, पाषाण आणि कात्रज या परिसरामध्ये रात्रीच्या वेळी चांगलीच थंडी जाणवत आहे. याउलट, शहराच्या मध्यवर्ती भागांमध्ये थंडीचा प्रभाव नगण्य असून तिथे उकाडा जाणवत आहे.

पुढील 24 तासांत पावसाचा अंदाज, तर थंडीचा कडाकाही वाढणार
पुणे वेधशाळेने दिलेल्या माहितीनुसार, पुढील दोन दिवस आकाश निरभ्र राहील आणि तापमानात मोठा बदल होणार नाही. मात्र, 23 जानेवारीपासून शहरात ढगाळ वातावरण तयार होण्याची शक्यता आहे. दुसरीकडे, भारतीय हवामानशास्त्र विभागाने दिलेल्या इशारानुसार पुढील 24 तासांत मध्य महाराष्ट्रातील काही ठराविक ठिकाणी पावसाच्या हलक्या सरी कोसळण्याची शक्यता आहे. तर उत्तर महाराष्ट्रात पुढील दोन दिवसांत किमान तापमान 2 ते 3 अंशांनी घटणार असल्याने विदर्भासह काही जिल्ह्यांत थंडीचा जोर वाढेल.