Pune Crime : आई-भावासमोरच तरुणीचं अपहरण! भिगवण येथील थरकाप उडवणारी घटना; परिसरात खळबळ

Pune : पुरोगामी ख्याती असलेल्या महाराष्ट्रात महिला आणि मुलींच्या सुरक्षेचा प्रश्न ऐरणीवर आला आहे. राज्यात महिला आणि मुलींच्या विनयभंगाच्या आणि अत्याच्याराच्या घटना सातत्याने समोर येत आहेत. पोलिसांकडून या प्रकरणातील आरोपींच्या विरोधात कठोरात कठोर शिक्षा केली जात असली तरी गुन्हेगारीच्या घटना काही केल्या कमी होताना दिसत नाहीत. इंदापुरातून तर अतिशय भयानक आणि डोकं चक्रावणारी घटना समोर येत आहे. इंदापुराच्या भिगवण परिसरात आई आणि भावाच्या डोळ्यांसमोर तरुणीचं अपहरण झाल्याचा धक्कादायक आणि सतापनजक प्रकार समोर आला आहे. या घटनेमुळे आरोपींना कायद्याचं भय राहिलेलं नाही का? असा प्रश्न निर्माण होत आहे. या घटनेप्रकरणी गुन्हा दाखल झाला आहे. अपर पोलीस अधीक्षक गणेश बिरादार यांनी या घटनेवर सविस्तर प्रतिक्रिया दिली आहे.

"या प्रकरणी अपहरणाचा गुन्हा दाखल झाला आहे. जाहीर हारून शेख आणि आयान हारून शेख या दोन आरोपींनी दुचाकीवरुन जाणाऱ्या आई, मुलगी आणि तिच्या भावाच्या डोळ्यांत लाल चटणी टाकून त्यांना अडवलं. त्यानंतर त्यांनी 21 वर्षीय मुलीचं अपहरण केल्याबाबत भिगवण पोलीस ठाण्यात गुन्हा दाखल झाला आहे. या प्रकरणाच्या तपासासाठी काही टीम रवाना करण्यात आल्या आहेत. विविध टोल नाके आणि रस्त्यावर असलेले नाकाबंदी या दोन्ही माध्यमातून भिगवण पोलीस आरोपींचा शोध घेत आहेत", अशी माहिती अपर पोलीस अधीक्षक गणेश बिरादार यांनी दिली आहे.

अपहरणाची ही धक्कादायक घटना भिगवण येथील वार्ड नंबर 5 येथे मंगळवारी (17 फेब्रुवारी) दुपारी चारच्या सुमारास घडली. भर दिवसा हा प्रकार घडल्यामुळे अनेकांकडून आश्चर्य व्यक्त होत आहे. आरोपी मुलीचे इतक्या खुलेपणाने अपहरण करुच कसे शकतात? त्यांना पोलिसांचे भय नाही का? असे प्रश्न आता उपस्थित होत आहेत.