नाशिक: येवला-नांदगाव महामार्गावर लक्झरी बस उलटली, एका प्रवाशाचा मृत्यू तर अनेकजण जखमी.

नाशिक: जिल्ह्यातील येवला-नांदगाव राज्य महामार्गावरील सोमठाणे जोश घाटात आज पहाटेच्या सुमारास एक भीषण अपघात झाला आहे. प्रवाशांनी भरलेली एक खासगी लक्झरी बस अचानक उलटल्याने एका प्रवाशाचा जागीच मृत्यू झाला आहे, तर ५ ते ६ प्रवासी जखमी झाले आहेत. अपघाताची माहिती मिळताच स्थानिक नागरिक आणि पोलिसांनी घटनास्थळी धाव घेत तातडीने मदतकार्य सुरू केले.

अपघात कसा घडला?
मिळालेल्या प्राथमिक माहितीनुसार, ही खासगी लक्झरी बस मध्य प्रदेशातील होती. आज सकाळी सोमठाणे जोश घाटातून जात असताना, चालकाचे बसवरील नियंत्रण सुटले आणि बस घाटातच उलटली. अपघाताच्या वेळी बसमध्ये सुमारे २० ते २५ प्रवासी प्रवास करत होते. बस पलटी होताच प्रवाशांमध्ये एकच गोंधळ उडाला आणि मदतीसाठी किंकाळ्या ऐकू येऊ लागल्या.

 

जखमींना रुग्णालयात दाखल केले:
या भीषण अपघातात एका प्रवाशाचा जागीच दुर्दैवी मृत्यू झाला आहे. तर ५ ते ६ प्रवासी जखमी झाले असून, त्यांना तातडीने उपचारासाठी नांदगाव येथील ग्रामीण रुग्णालयात दाखल करण्यात आले आहे. तेथे त्यांच्यावर उपचार सुरू आहेत. अपघात एवढा भीषण होता की, लक्झरी बस थेट रस्त्याच्या मधोमध आडवी झाली.

यामुळे येवला-नांदगाव रस्त्यावरील वाहतूक पूर्णपणे ठप्प झाली होती आणि दोन्ही बाजूंना वाहनांच्या लांबच लांब रांगा लागल्या होत्या. पोलीस प्रशासनाने बस बाजूला करून वाहतूक पूर्ववत करण्याचे प्रयत्न युद्धपातळीवर केले आहेत. अपघाताचे नेमके कारण अद्याप समजू शकलेले नाही, पोलीस या प्रकरणी अधिक तपास करत आहेत.