एलपीजी सिलिंडर रिफिल बुकिंग नियमात मोठा बदल; ग्रामीण भागातील ४५ दिवसांचा कालावधी रद्द करून आता पुन्हा २५ दिवसांत मिळणार सिलिंडर

देशात घरगुती एलपीजी (LPG) गॅस सिलिंडरच्या पुरवठ्याबाबत आणि बुकिंगच्या नियमांमध्ये केंद्र सरकार व तेल कंपन्यांकडून महत्त्वपूर्ण बदल करण्यात आले आहेत. यापूर्वी पश्चिम आशियातील तणाव आणि मागणीतील अचानक वाढीमुळे गॅसचा पुरवठा सुरळीत ठेवण्यासाठी आणि काळाबाजार रोखण्यासाठी नियमांमध्ये तात्पुरते बदल करण्यात आले होते. या बदलांतर्गत शहरी भागासाठी २५ दिवस आणि ग्रामीण भागातील ग्राहकांसाठी सिलिंडर रिफिल बुकिंगचे अंतर वाढवून थेट ४५ दिवसांचे करण्यात आले होते.

मात्र, आता एलपीजी गॅसचा पुरवठा पूर्ववत् आणि सुरळीत होत असल्याने सरकारने ग्रामीण भागातील ग्राहकांसाठी असलेला ४५ दिवसांचा निर्बंध मागे घेतला आहे. केंद्रीय पेट्रोलियम आणि नैसर्गिक गॅस मंत्रालयाने घेतलेल्या निर्णयानुसार, आता शहरी आणि ग्रामीण अशा दोन्ही भागातील सर्व घरगुती एलपीजी ग्राहकांसाठी सिलिंडर बुकिंगचा कालावधी हा एकसारखाच म्हणजेच २५ दिवसांचा असणार आहे. पेट्रोलियम मंत्री सुरेश गोपी यांनी देखील या बदलाची पुष्टी करत तेल विपणन कंपन्यांना (OMCs) हे निर्देश त्वरित लागू करण्याच्या सूचना दिल्या आहेत.

पूर्वी काही नागरिकांकडून गॅसटंचाईच्या अफवांमुळे गरजेपेक्षा जास्त सिलिंडरचा साठा केला जात होता, ज्यामुळे वितरण व्यवस्थेवर मोठा ताण आला होता. परंतु आता पुरवठा सुरळीत झाल्यामुळे आणि ग्रामीण व शहरी असा भेद संपवून एकच युनिफॉर्म कालावधी लागू केल्यामुळे ग्राहकांना मोठा दिलासा मिळाला आहे. आता ग्राहकांना आवश्यकतेनुसार २५ दिवसांच्या अंतर In ने पुढील सिलिंडरची नोंदणी करता येणार आहे.